Ka Nu Biacah Ka Philh Lo; Vice President Pu Henry Van Thio

Salai Elvis| 2019 January 19| A hnu bik hringtu ka nu he kan ton lio i a biacah le a bia rovuih ka philh lo tiah Pu Henry Van Thio nih January 19 zingka, Tikir UPC Lung biakinn thar sakmi hunnak ah a chim.

Pu Henry Van Thio cu Ralkap a rak tuan- Captain a si lio ah a naupa Pu Van Kio nupi thitpiak dingin Tikir khua a rak tlun lio a nu Pi Ngun Par nih a tu bantuk in bia a rak cah hi a si.

“Cu lio ah cun UPC Biakinn cu Biakinn thapi an ngeih lo caah thlam tein an rak tuah. Vawlei ah tung bunh in sak mi a si tikah thutdan zong an rak ngei lo i thingpum pahnih cung ah an rak thu, cu lio ah ka nu nih ro a ka vuih ka ti lai cu. Ka fa a biakinn sak tiang cu kan hal ngam lo e, Tarnu/pa hna caah hin thingpum cung thut hi kan tawruh a fak tuk. Cucaah cun aa zia deuhnak ding caah thingah/zel cung thutnak tal rak kan tuahpiak law a rak ka ti. Asinain, cu lio ahcun tangka kaa ken mi vialte ka nau pa nupi thitnak caah kan hman dih cikcek. Tuahnak ding caah tangka ka ngei ti lo, kir nak ding ca lawng ka ngei cang. Ka lungsia herh bu tein ka rak kir nain ka philh lo”.

“Cu hnu kum nga/ruk ah ka nu nih a kan thih tak. Cucu a hnu bik kan i ton a rak si. Ka nu rovuih bia te kha ka thinlung chungah a cam peng. Major in Civil lei kaa thial, Mandalay seh-zung ka tuan lio ah ka nu bicah te kha ka si khawh tawk tein tuanchuah ding kaa tim i Mandalay UPC Biakinn cu pakhatnak ah ka rak remhpiak hna. Cun Tikir kha camphio le thing inn ka rak tuahpiak hna. Rev. Than Mawi Jubilee le keimah nih thinginn ka sakpiak mi hna Biakinn cu hmun khat ah hunnak an rak tuah ti, kei cu ka tel kho ti lo”.

“Newzerland ram rak um chung 2013 kum hrawng ah ka rak tlung. Biakinn pawngkam thingkung cu Khrihfabu hna nih mit a pheng tiah an rak hau dih. Thli pheng thingkung a um lo tikah ka mit hmuh hngan teah thli nih a phur. Ka lung a tha lo tuk. Ka nu biacah mi harsa tein ka tuahmi keimah hmuh hngan te i thli nih a phur cu a celh ka celh lo. Ramdang ka um cang caah zeiti hmanh in a si kho ti lo. Caan rem Pathian nih a kan hunpiak te lai ti ka hngak i a tu ah Pathian tawlrel pi nak thawng in hi inn zong ka vun ti than khawhnak a si. A mah Pathian sunhlawihnak ding caah le amah um pinak thawngin a si ko. Hi Biakinn saknak caah a kapkip in a kan bawmtu nan zate cungah kan i lawm, Pathian tu nih thluachuah in pe ko hna seh” tiah Vice President Pu Henry Van Thio nih Lung Biakinn thar hunnak tuah lio ah a chim.

Na ruahning rak langhter ve.. (Leave a comment)

%d bloggers like this: