Kachin Ram Peng Peng 10 Chung Ah Raltuknak A Chuak I Ralzaam An Karh Chin Lengmang

0

Salai Aung Aung| 2018 April 30| Kachin Ramkulh chungah Kachin ralkap le Cozah ralkap fak ngai in an i kap cuahmah i Kachin ramkulh, peng 18 chung in peng 10 ah raltuknak a um cuahmah i ralzaam an karh chin lengmang tiah theih a si.

Hriamnam ngan hmang in Myanmar Cozah ralkap nih an tuk hna hi KIA sakhan no. 1, no. 4, no. 10 le no. 11 pawl hi biapi in an tukmi a si. Hi chung ah sakhan no. 4 cu ralkap nih an laak tiah KIO in thawngpang thanhnak lei tuanvo nih a chim.

Kachin ramkulh remdaihnak kong ahhin phungphai, mumai in cun remdaihnak hi ramkhel kal ning in lam kawl ding ah ceihmainak kan ngeihmi pawl an um ko nain kan raltuknak kong he pehtlai in cun ralkap tel in cozah lutlai pawl he zeihmanh ceihruah ding ah timhtuah mi a um rih lo tiah Bohmogyi Naw Bu nih a chim.

Bohmogyi Naw Bu nih, kan hnu lei te zong ah khan Reuters thawngthanh phu sinah tutan kan i tuknak hi cu hlan vialte nak fak deuh in kan i kap tiah a chim.

Kaphnih ralkap thazaang an chap chin ve ve. Cozah ralkap lei zong nih an ralkap thazaang an chap chin cuahmah caah tuknak hi tu nak zong in fah deuh khawh a si tiah theih a si.

Raltuknak ruangah zatlang minung chung in 2000 tluk ralzaam buk an phan cang i hi hna zohkhenhnak caah a lamkip in bawmhchanhnak an herhnak kong biaknak lei lutlai upa nih an chim. Cun Nu, ngakchia le tar pawl caah an thinphan nak kong zong an chim.
Ref: BBC Burmese

About The Author

Na ruahning rak langhter ve.. (Leave a comment)

%d bloggers like this: