Kachin Siangcachim Minung Pahnih Kha KIA Nih An Rak Thahmi A Si; Senior General Min Aung Hlaing
TCP-Online| 2018 June 29| Shan ramkulh chaklei Muse peng Nantaung khua ah Kachin Baptist Church (KBC) nih mission rian i a rak thlahmi siang cachim nu pahnih cu sualpi le tlaihhrem an si hnu ah thah an rak si. Mah kong ah kanmah ralkap an rak kan puh i cithlatnak kan tuah tikah KIA kut in a thimi an si, tiah Senior General Min Aung Hlaing nih a chim.
June 18 ni Kawlram ralkap bawizik zung khualipi Naypyidaw ah Media nih biahalnak an tuah i a cunglei bang in Senior General Min Aung Hlaing nih cun a leh hna. KBC nih Shan ramkulh i Mission riantuan an thlahmi siang cachim minung pahnih thah kongah biatakte in cithlatnak kan tuah. KIA ralkap minung pahnih nih an tuahmi a si. Cu pahnih zong cu anmah KIA lei ah an um. Mah ka lei hin an um ti lo. Ralkap an rak puhmi kha bia hmaan lo, bia dik lomi a si, tiah mah tonnak i a kai vemi PC lutlai chang U Ung Gyang nih a chim.
Kum 20 tluk a simi Kachin siang cachim minung pahnih cu Shan ramkulh i Mission rian an tuan lio 2015 January 19 ni khan tlaihhrem an rak tong i cu hmun ahcun thah colh an rak si. Hi caan lio hi ralkap Khah-Mah-Yiah (503) nih, cuka hmun cu an rak congh lio he aa tong.
Senior General Min Aung Hlaing nih Media sin a chimmi kong he pehtlai in KBC chungtuan U Kha Li nih cun, “Senior General Min Aung Hlaing nih KIA hriamtlai phu pawl a puhmi hi a si kho lomi a si. Mah thlaihrem le thah an ton lio caan ah mah khua cu ralkap nih an rak congh hna. Cu ti an congh lioah KIA hriamtlai phu pawl hrim rak lut in zei an tuah lai lo. A si kho lomi a si. Cun, tu ah hi kong hi ralkap lei zong nih zeihmanh tuah ti lo in thawngpang a dai ngai cang” tiah a chim.
Ref: Irrawaddy
About The Author
