Kahdaih biaruahnak in a si khomi a phi chuak pawl tiah ngiathlaitu pawl ruahnak

0

The Chinland Post | 2022 May 20 – Tuni (May 20) in aa thokmi kahdaih biaruahnak chungin a phichuak a um lai tiah SAC biachimnak nawl ngeitu nih a chim. Myanmar ram ah hramhram in uknak lak a si hnu kum 1 leng hnu ah tlangcung hriamtlai phu pawl le SAC karlak biaruahnak ah tlangcung hriamtlai cheukhat cu kai lo ding in biakhiahnak an ngei.

Hramhram in uknak lak a si hnu ah a voikhatnak bik tuah a simi biaruahnak ah zeibantuk harnak le zeibantuk a phi pawl dah a chuak kho timi cungah ngiathlaitu cheukhat ruahnak pawl fonh in VOA nih a langhter.

Hi biaruahnak he pehtlai in Major-General Zaw Min Htun nih ” Ralkap hruatu lubik nih hi biaruahnak in a phichuak um ding in kan ceih lai tiah a ciami a si cang”.

A phichuak a um khomi cungah Myanmar ramkhel lei ngiathlaitu U Ye Htun nih ” a phichuah a har ngai lai tiah ka ruah. Nationwide Ceasefire Agreement (NCA) ah min a thumi pawl caah cun a poi lo nain NCA min a thu lomi hna caah cun an hal dingmi kong hi 2008 phunghram he a kalh a si ahcun phunghram a thar in ṭial ṭhan a si kho men. Cu chungah, thazang a ṭhawngmi United Wa State Army (UWSA) hi SAC nih bia a ruah kho lai maw timi hi a biapi deuh tiah ka ruah”.

Asinain ruahchannak a um pahmi cungah kahdaih biaruahnak ah aa tel lengmangmi U Ko Ko Gyi nih ” A bik cu ralkap hruaitu lubik nih amah pumpak in a ton hnik hna. Cun zeibantuk riikhiahnak le zulhphung hmanh um loin zalong tein biaruah khawh a si tiah National Day ah a chim caah voidang biaruahnak bantuk he a khat ti lo tiah ka hmuh. Cun, khatlei phu pawl zong harnak an ngeih cio caah mahhi caanṭha ah an hman khawh a si ahcun luatnak pakhat khat an hmu lai tiah kaa ruahchan”.

Cubantuk ruahchannak a um khawhnak hnga U Ye Htun nih ” Biaruahnak a tluan khawhnak hnga – tlangcung hriamtlai phu pawl nih an chuahpimi chung in zeibantuk hi dah Federal phung chung a luh caah SAC nih kan in al hna lo,  phunghram ṭial ṭhannak caan na kan pek a si ahcun ka ṭial ṭhan lai tiah biakamnak a tuah a si ahcun a tluang kho. Cuti si loin a hlan lam an zulh ṭhan a si ahcun a fawi lai lo”.

U Ko Ko Gyi zong nih “Myanmar ram ah buainak pahnih a simi Democracy le Federal he aa pehtlaimi hnatlaknak an ngeih a si ahcun, ramkhel lei a ṭhami muisam pakhat a chuak lai tiah ka ruah. Ralkap nih ramkhel lei ah kaa tel ti lai lo timi bia hna a chim a si ahcun mipi zumhnak zong a karh kho men. Thlennak caah hnatlaknak an ngei lai, ASEAN Special Representative bantuk in ramdang teltumnak an pehtlaih khawh a si ahcun ramkhel lei buainak a phichuah khawhnak lam aa thok tiah ka ruah.”

Cun, tutan biaruahnak a tlamtlin lo a si ahcun, biaruahnak um khawh ṭhan a har cang lai caah kahdohnak a fak chin lai tiah thinphang a si.

Ref : VOA

About The Author

Na ruahning rak langhter ve.. (Leave a comment)

%d bloggers like this: