Kahdohnak a chuak lai timi thawngpang ruangah Rihkhawdar khuami India ram ah an zaam
The Chinland Post | 2022 March 8 – India-Myanmar ramri, Chin ramkulh, Falam peng, Rihkhawdar khua ah Ralhrang le Chinland Defense Force (CDF) karlak ah kahdohnak a chuak lai timi thawngpang a than ruangah Rihkhawdar khua No.1 le No.2 sang mipi an zaapi tein March 7 zaanlei ah India ramlei ah an zaam dih tiah thawng theih a si.
Chinland Defense Force-Hualngoram nih March 7 ah cathanh pakhat a chuah. Cu cathanh ahcun, Rihkhawdar No.2 sang (Ṭio tiva) kam ah a ummi mipi hna nih zaanlei sml 6:00pm hlan ah himnak hmun ah ṭhial dih dingin thawng a thanh caah a tu bantuk in mipi hna nih India ramlei ah an zaam dihnak hi a si.
“Kahdohnak hi tuni maw a chuah lai thaizing ti a fian lo caah kan zapi tein Zokhua thar lei ah chungkhat a ngeimi nih chungkhat inn ah, chungkhat a ngei lomi nih buk i sak in um a si” tiah khuami pakhat nih Khonumthung Burmese ah a chim.
Rihkhawdar No.1 sang mipi hna cu CDF-Hualngoram nih cathanh a chuah bak in India ram lei ah an zaam dih, tar cheukhat lawng khua chungah an tang” tiah khuami pakhat nih a chim.
“ A tam deuh cu zaam dih a si ko. A zaam kho lomi le tar pawl lawng an tang lai” tiah khuami pakhat nih a chim.
Rihkhawdar No.2 sang tlang cungah a ummi ralhrang pawl le CDF cu March 5 zinglei ah kahdohnak a chuak. Cu kahdohnak ahcun, ralhrang 9 an thi tiah CDF sin in thawng theih a si.
Cu kahdohnak ruangah No.2 sang mipi a cheu leng cu Mizoram Zokhua thar ah zaam dih a rak si. A tu zong CDF-Hualngoram cathanh ruangah an zaam chap ṭhannak hi a si.
Rihkhawdar peng chung ummi New Rihkhawdar, Old Rihkhawdar, Haiheng, Old Lianhna, New Lianhna, Vutbuak, Kawilam, New Haimual, Zimpui le Zimte khua hna nih CDF-Hualngoram theihpinak um lo in Rihkhawdar No.2 sang le ramtang kal loding in a cathanh ah a telh chih.
Cun, Kalay-Tedim-Rihkhawdar lam cung a zulmi mawṭaw pawl nih March 8 thokin Rihkhawdar lei kal loding in CDF-Hualngoram nih a thanh.
About The Author
