Kahdohnak a hruaitu pawl thiam lo ruangah ralkap pawl a thimi an tam tiah General Min Aung Hliang nih a chim
Min Aung Hliang, RFA
The Chinland Post | 2022 September 12 – SAC ralkap lei in a thimi an tamnak a ruang cu kahdohnak a hruaitu pawl thiam lo ruangah a si tiah SAC hruaitu General Min Aung Hliang nih a chim.
SAC hruaitu General Min Aung Hliang nih June thla chungah tuahmi a zarhlinak ralkap meeting ah a chimmi a si i cu meeting record cu CDM ralkap pawl nih an dirhmi Pyithupantai phu nih an langhter.
2022 January, February, March le April thla 4 le May thla chungah a chuakmi kahdohnak chungah SAC ralkap a thimi an tam tiah ralkap hruaitu nih a chim.
Cu bantuk in a thimi an tamnak thil sining kan zoh ṭhan a si ahcun kan ral thazang a ṭhawn chin ruang, ralkap thazang a der chin lengmang ruangah a si i kanmah ralkap thadernak (weakness) a um caah a si tiah SAC hruaitu nih a chim.
Thilsinning a pakhatnak cu hmunhma pek dan a dik lo ruang, a pahnihnak cu hmunhma kan zohfel dan a dik lo ruang le a pathumnak cu ralkap an funtom dan lih hrawkhrol in report an pek ruang le a donghnak bik cu raltuknak cawntermi an hman khawh lo ruangah a si tiah General Min Aung Hliang nih a chim.
Mah nih dohnak siseh, i khamnak siseh ralkap hmunhma chiah dan le samh dan ṭha tein tuah lo ruangah sungnak a tam kha hmuh khawh a si i ralṭhatnak ngeih loin ṭihphan ruangah nawlngeihnak a um lo kha hmuh khawh a si tiah a peh.
Kahdohnak a hruaitu pawl thadernak kha tampi hmuh khawh a si i hruainak he pehtlai in zeidah kan tha a dernak a si timi kha kan ruah ṭhan tikah minung tamtuk in kan cawm/zohkhenh (မွေးထုတ်) hna caah a si tiah a chim.
Cun kamkhat lei ah Drone in bom thlaknak, Drone in hmunhma zohfelnak ngeih hnuah khoika zawh ah hodah an um timi kha an i pehtlaih khawh caah sunghnak a tam tiah General Min Aung Hliang nih a chim.
Kan ral pawl an umnak sakhaan pawl ah kahdohnak kan tuah lonak a ruang hi NCA minthut ruangah a si i kanmah sakhaan pawl an kan doh ahcun kan kham hna, hmunhma tamtuk lonh in cawlcanghnak a tuahmi phu pawl cu kan doh hna tiah SAC hruaitu nih a chim.
Kahdohnak sinning kan zoh tikah kan ral nih thazang fonh in an kan doh i Ambush raltuk dan an hman tiah General Min Aung Hlaing nih a chim.
Kahdohnak chungah meithal kuan kan hmanmi a tamtuk caah kuan a chuah cun a za ko timi lungput in kan kah tiah General Min Aung Hliang nih meeting ah a chim.
SAC cu tlangcung hriamtlai pawl, PDF pawl he kahdohnak ah a sung tuk i vanlei kahdohnak tam deuh in a hman cang kha hmuh khawh a si.
About The Author
