“Kahdohnak Dirhmun Hi Cu Thazang An Chap Thluahmah Rih Lai” Salai Htet Ni

0

The Chinland Post | 2023 June 7 — Chin ramkulh, Hakha le Thantlang khua karlak Timit le pawnghrawng ah SAC ralkap le CDF, CNA phufonh hna karlak ah kahdohnak a chuah hi atu cun zarh 2 a rau cang. Timit kahdohnak ah SAC lei a thi mi an tam bantuk in CDF, CNA phufonh lei zong in a nunnak a pe mi an tam cang.

SAC ralkap nih Timit lonh in Thantlang khuachung luh le an kuttang ah um kho ding an i zuam tiah theih a si.

Cu kong he pehtlai in CNA biachimnak nawl a ngeitu Salai Htet Ni le Khonumthung Burmese biaruahnak an ngeih mi kha The Chinland Post nih Laica in kan rak leh chin.

 

Khonumthung Burmese: Hakha-Thantlang karlak, Timit kahdohnak dirhmun a fiannak in na kan chim kho hnga maw?

Salai Htet Ni : SAC ralkap pawl hi May 26 in an rak kai cang. May 26 a tlin hlan ni 3 aa duh ah vawlei lei ralkap pawl ca lam thianhpiak ding in ni 3 chung pehzulh in vanlawng nih bom a thlak, hriamngan in a kah hnu May 26 ah an rak kai. An rak kai ni May 26 in nihin ni tiang pehzulh in kahdohnak a fak. Kanmah lei in 12 an nunnak a liam cang i 10 hrawng hliam an tuar. Anmah lei hi 30 deng, an tuak khawh zat ah 27 an si, hliam a tuar mi cazin hi 15 an si tiah kan theih. Kahdohnak hi cu pehzulh in a fak rih ko lai. Anmah lei hi thazang 150 hrawng in an rak kai. A biapi cu Thantlang khuachung thazang chap ding le hmunhma an tlaih khawh hnu ah kanmah lei hriamtlai phu hrawh cikcek ding dirhmun khi an i timh mi a si.

Khonumthung Burmese: Timit kahdohnak ah CDF, CNA phufonh lei 12 tiang an nunnak a liam mi hi zeiruang bik dah a si?

Salai Htet Ni : A ruang bik cu hriamngan ruang ah a si, May 29 ah kanmah lei 1 hliam tuar i adang a hawile nih an va khamhnak ah hriamngan nih a tlak hna i 6 an nunnak a liam. Hliam a tuar mi hna hi sizung an phak hlan ah an nunnak a liam mi zong an um. A ruang bik cu hriamngan ruang ah a nunnak a liam mi an tam.

Khonumthung Burmese: SAC ralkap pawl hi zeibantuk ruahchannak he dah Thantlang lei an panh?

Salai Het Ni : Chin ramkulh hi Ralkap Uknak an thanh. Cun tukum chung ah Chin, Karen le Sagaing ramṭhen hna hi vanlei le vawlei lei thazang tampi hmang in kahdohnak a tuah lai tiah a thlithup thawng kan rak theih cang. Mipi hriamtlai pawl hrawh dih hnu ah Victoria Camp hrawh ding hi an i zuam.

Khonumthung Burmese : Thantlang an uk khawh ṭhan hnu ah CNF Headquarters an naih lai ti duhnak maw?

Salai Htet Ni : A si. Cubantuk cun a si tiah chim khawh a si. Zeiruang kan ti a si ahcun an rak chim cang mi a si. Min Aung Hliang nih a rak chim cang. Chimduhnak cu NUG he aa pehtlai mi poah fak pi in dantat nan si lai tiah a rak chim cang. Cucaah cu bantuk Plan in an cawlcangh hi a si. Zapi nih nan i fian cia a si ko lai.

Khonumthung Burmese : Kahdohnak dirhmun hi zeidah a lawh lai? A zual chin kho mi a si maw?

Salai Htet Ni : Kahdohnak dirhmun hi cu thazang an chap thluahmah rih lai. Zeiruang kan ti a si ahcun amah pumpak nih Chin ramkulh, Sagaing, Karenni hna ah tukum chung ah thazang ka chap lai timi thawngpang kan rak theih cang. Zeibantuk dirhmun hmanh ah kan tuak cia a si cang. Anmah lei nih kahdohnak fak pipi an tuah zong ah kanmah lei nih cun doh ṭhan ve ding in timhtuahnak kan ngeih cia a si. A hnubik an dirhmun cu Myanmar ram ramkhel dirhmun chung in chuah bak lo ding le a zungzal dirhmun ngeih peng kha a si. Cucaah mipi zong hrial lo in ral ah a ruah dih hna.

Khonumthung Burmese : Timit kahdohnak chung ah CDF, CNA lei a nunnak liam mi an tam kha hmuh khawh a si. Cu kong he pehtlai in zeidah chim na duh mi a si?

Salai Htet Ni : Kanmah hna caah cun atu lam hi dothlennak lam cung ah a cang mi thil pakhat a si. Asinain ram dawtnak le ram le miphun caah ti in kan i timtuah cia mi a si. Cucaah kan kuttang pawl an nunnak a liam hi cu kan ngaih a chia hrim ko, asinain SAC lei nih a tuah mi sualnak a fah deuh poah kan lungput a ṭhawng deuh ve, mipi nih SAC an huat deuhdeuh ve. Asinain in kanmah lei nih kan tei deuh hna ti mi kha cu zapi theih a si ko. Kan ralkap hna an nunnak a liam mi hi cu minung kan si bantuk in kan ngaih a chia ko. Zeibantuk a si hmanh ah a dongh tiang kan doh lai tiah lungthlehnak kan ngeih cang mi a si. Mipi caah kan ṭuan mi a si kha mipi zapi nih an i fian cia a si ko lai tiah chim ka duh.

Ref : Khonumthung Burmese

About The Author

Na ruahning rak langhter ve.. (Leave a comment)

%d bloggers like this: