Kahdohnak pehtlai in a chuahnak Hakha khua meithat zung a kaang, mei thahnak mawṭaw 2 a kaang
The Chinland Post | 2022 October 17 – Chin ramkulh, Hakha khua chung ah SAC ralkap le CDF hna karlak atulio ah nifatin ngawt in kahdohnak a chuak ṭhan i October 15 zong ah Hakha Thar sang ah a ummi pengkomh meithat zung a kaang i mei thahnak mawṭaw 2 a kang dih tiah SAC leiṭang thawngzamh pawl nih an langhter.
“Atulio hi meithal thawng le bom thawng theih lengmang a si. Nifatin ngawt in Hakha hrambunh SAC LIB 266 nih hriamngan an thlah lengmang i thinphang thlalau in kan um cio. Meithat zung a kangh zong cu kan theih ko nain zeitin dah mei an thah khawh ṭhan timi bel kan thei lo, meithat mawṭaw 2 a kaang tiah kan theih” tiah Hakha khuami nih The Chinland Post ah a chim.
October 17 zinglei zong ah Cawbuk sang ah a ummmi gate lei in meithal thawng kan theih tiah khuami nih an chim.
“Zingka lam ka zawh lio ah cawbuk gate lei in meithal thawng ka theih. Khuadei ka hrawng te a si i an thawng hi sau a thang lo” tiah a chim.
October 17 zinglei thok in Hakha hrambunh SAC LIB 266 nih hriamngan pehzulh in an thlah i khua zong a tlerh dih tiah thawng theih a si
About The Author
