Kahdohnak ruangah Paletwa peng khuami 500 leng Mizoram ah an zaam

The Chinland Post | 2022 September 6 – Chin ramkulh thlanglei Paletwa ah September thla thok hrawngin AA le SAC ralkap karlak ah a chuakmi kahdohnak ruangah khuami 500 leng Mizoram, Lawngtlai lei ah an zaam tiah Khonumthung Burmese nih a langhter.

India ramri ah a ummi Paletwa peng, Meikwa khua i SAC ralkap sakhaan cu September 1 ah AA nih an rak kah hnuin pehzulh in kahdohnak a chuak i SAC ralkap nih vanlawng hmang in kahdohnak a tuah ruangah Meikwa khuami hna cu Mizoram,  Lawngtlai ah an khua ningin an zaamnak hi a si tiah ralzaam bawmtu pakhat nih Khonumthung Burmese ah a chim.

“An khua ah kahdohnak a chuak, SAC ralkap nih vanlawng in voihnih bom an thlak ruangah an zaam, atu cu an chungkhat sinah an um” tiah a chim.

Ralzaam hna cu Lawngtlai peng Zochachhuah ah minung 115, Hmawngbuchhuah ah minung 210, Laitlang khua ah 127 le Dumzautlang khua ah minung 137 tiah an zapi 589 an um tiah Lawngtlai pengkomh ralzaam committee phu cazin in theih a si.

Lawngtlai pengkomh ah ralzaam an rak luh chapmi kong he pehtlai in Lawngtlai District Level Committee on Myanmar Refugees phu zong nih meeting an auh i ralzaam pawl bawmhnak kong biaruahnak an ngei tiah theih a si.

A rak phan tharmi ralzaam pawl an umnak ralzaam camp caah ruahkhamnak, Ngamdamnak lei zohkhenhnak caah Doctors without Borders phu he a herh ahcun rianṭuanṭi ding le ralzaam hna caah puan, Commode, Hygiene kits le adang a herhmi thilri pawl pek ding in meeting ah bia an khiah theih a langhter.

Lawngtlai khua Central Young Lai Association phu nih ralzaam hna ei ding in facang tun 55 an phawt hna tiah theih a si.

Lawngtlai pengkomh ah Myanmar ralzaam 5,909 an um i cu chung i 589 hi cu tulio AA le SAC ralkap karlak kahdohnak ruangah a rak phanmi an si i a tangmi 5,320 hi cu 2021 February 1 in SAC nih hramhram in uknak a lak hnu ramkhel buainak ruangah a rak phanmi an si tiah theih a si.

Na ruahning rak langhter ve.. (Leave a comment)

%d bloggers like this: