Kahdohnak thawng: Miphun ralkap 2 nih nunak an pek, Kawl ralkap 38 thah le 49 hliamh an si
Post Staff| January 19-27, Chin ramkulh chung hmunkip Matupi, Falam le Thantlang peng kahdohnak ah ralhrang Kawl ralkap in minung 38 tluk an thi i, 49 tluk an hliam hna tiah kan theih. Hi Zarhkhat fai chung kahdohnak ah, Miphun ralkap pahnih nih nunnak an pek i Falam peng le Thantlang peng ah pakhat veve an si tiah miphun ralkap hna cathanh in kan theih. Hi langhtermi a thimi le hliammi kong ah Chinland Post nih dangte in kan fehter khawh mi a si lo.
#English| Two Chin fighters died while the Chin defense group has claimed to kill at least 38 regime soldiers and injuring over 49 in fighting against regime troops between January 19-27 across Chin State particularly in Matupi, Falam and Thantlang Townships.
A tanglei ah a peng zawn cio in, kahdohnak umtuning in kan hun langhter;
CDF-Matupi kahdohnak
January 26 ah, Matupi-Paletwa lam cung i a um mi Kawl ralkap battalion 304 cu CDF-Matupi le CNA fonh in zaanlei suimilam 4 ah an kah. Cu kahdohnak ahcun Kawl ralkap lei in minung 8 an thi i 10 leng an hliam hna tiah kan theih. Kawl ralkap lei in hriamnam ngan he zaanlei suimilam 5 tiang an kah hna i kahdohnak a fak ngai. Miphun hriamtlai lei in aa khawngdeng mi an um lo tiah CDF-Matupi cathanh in kan theih.
January 26 ah, Matupi le Mindat lam cung i meng 80 tung zawn ah zinglei 9 in kahdohnak a chuak i Kawl ralkap lei in 5 an thi i 10 leng an i khawng. Kawl ralkap nih hriam ngan in kah thlorh in an an kah caah a pawngkam khua ah a tla tiah CDF-Matupi nih cathanh an chuah.
Cun, cu hlan, January 24 ah, Matupi le Mindat lam cungah, Matupi in a rak chuakmi Kawl ralkap pawl cu CDF-Matupi nih an kah ṭhan hna i Kawl ralkap lei in 1 a thi i 3 an i khawng. Mipi hriamtlai lei in i khawhdennak a um lo tiah thawng kan theih.
CNDF Falam kahdohnak thawng an thanh ning ah,
2022 January 19 ah, Chin ram, Falam peng ah CNDF nih an hmanh mi bom cu Kawl ralkap nih voi 3 tiang an i lamh caah 7 an thi i 10 leng an i khawng. Ralbawi pakhat a ke pahnih aa tan i ralhruaitu pakhat a mit kek chap tiah theih a si.
Cu bantuk in January 23 ah, Chin ram, Falam peng Zawngle khua pawng ah Kawl ralkap nih kahdohnak an thok caah CNDF le CNA fonh in chunnitlak kahdohnak a chuak. Kawl ralkap lei in 13 an thi 11 an i khawng. Kanmah CNDF lei in pakhat nih a kan liamtak i kan phu hnih fonh in 4 an i khawng ko nain thinphan awk a um lo.
CNDF cathanh ning in, a nunnak a pemi hi Salai Sap Din Ṭhuama (kum 31) a si tiah kan theih.
January 25 zongah, Kawl ralkap cu CNDF le CNA fonh in kan dironh ṭhan hna i Kawl ralkap lei in 4 an thi i 5 an i khawng. Cu kahdohnak ahcun miphun lei hriamtlai in i khawndennak a um lo tiah theih CNO nih cathanh a chuah.
CDF Thantlang kahdohnak
January 27 ah Thantlang ah CDF le ralhrang Kawl ralkap kahdohnak ah miphun ralkap in Salai Khua Tin Thang nih nunnak a pek i, a dang CDF/CNA pahnih zong a fak lem lo in an i hliam tiah theih a si.
Tutan kahdohnak ah, a cheukhat nih Thantlang CDF hmuithiam (sniper) nih ralhrang tamlak a hrilh (thah) hna tiah an chim. Kawl ralkap nih hriam ngan an hman ruang ah kahdohnak tuan ah an ngol tiah theih a si, nain CDF Thantlang lei in zeihmanh thanhnak an tuah rih lo.
Kan hnu kum chung ah Chinland Joint Defense Committee (CJDC) nih cathanh a chuahning in 2021 April 21 in December 31 tiang ah CJDC chungtel le Kawl ralkap kahdohnak voi 180 a chuakmi ah mipi 27, miphun ralkap 58 le Kawl Ralkap in 1029 an thi tiah a thanh.#
