Kalay-Hakha lamcung kahdohnak ah SAC ralkap 45 hrawng an thi: CNDF
The Chinland Post | 2022 July 20 – Kalay in Hakha ah a kalmi SAC ralkap mawṭaw pawl cu CNDF telh in Chin hriamtlai phufonh nih an kah hna i CNDF aa telnak kahdohnak chungah SAC ralkap 45 hrawng an thi tiah CNO/CNDF nih a thanh.
SAC ralkap thazang 200 leng aa telmi ralkap mawṭaw 30 hrawng cu Kalay in Hakha lei kal ding in June 30 ah an i thawh i July 4,5,6,7 ah CNDF nih Kalay-Hakha lamcung ah an kah hna i kahdohnak chungah SAC ralkap 5 an thi i hliam a tuarmi zong an um tiah a thanh.
Cun July 7 ah Falam in Hakha lei ah an kal ṭhan i Chin hriamtlai phufonh nih an kah ṭhan hna. July 8-11 tiang kahdohnak chungah SAC ralkap 40 hrawng an thi i hliam a tuarmi zong an um tiah a langhter.
SAC ralkap pawl cu Chin hriamtlai phufonh a simi CJDC nih July 16 tiang an kah hna. CNF cathanh chungah cun July-16 tiangah kahdohnak voi 8 a chuak i SAC ralkap 60 hrawng an thi tiah a thanh.
Falam-Hakha lamcung kahdohnak ah Chin hriamtlai phufonh in 2 an nunnak a liam i hliam a tuarmi zong an um tiah theih a si.
SAC ralkap pawl nih an ratnak lamcung ah a hna a ṭha ti lomi nu pakhat le pum tlamtling lo pa pakhat an thah hna tiah CNO/CNDF nih a thanh.
Cun, Falam-Hakha lamcung ah a ummi khuate inn pawl zong SAC ralkap pawl nih an khangh tak tiah theih a si.
About The Author
