Kalay Hrambunh CYO-KK Nih General Meeting Le EC Thar Thimnak An Tuah Lai

0

TCP-Kalay| 2018 October 24|  Kalay khuachung ah hrambunhmi Chin Youth Organization of Kalay Kabaw (CYO-KK) nih aralaimi Oct 27 ni Carson Baptist Church ah General Meeting le EC thar thimnak an tuah lai tiah CYO-KK President Salai Van Nun Ham sin in kan theih.

“Atu lio EC hi Member 19 kan si i kum hnih chung kan tuan cang. Kan phunghram ningah kum hnih voi khat thimnak tuah siseh ti kan ti caah tu a ralaimi Oct 27 khin thimnak cu kan tuah cang lai. Kanmah EC lei nih Nomination Committee zong kan thim cang hna, anmah nih min an tarmi chungin mizapi a rami nih thim an si te lai” tiah a chim.

CYO-KK EC thar thimnak ah hin Kalay khuachung khrihfabu kip Mino vialte le chiat/that bu fellowship hna zong sawm chih an si. Sawm mi minung zat an rat khawh cun a tlawmbik minung 100 tel an tling te lai tiah CYO EC lei nih cun an ruahdamh.

Mah ni i thimnak tuah hlan ah hin CYO-EC lei nih report peknak tete zong an ngei te lai. A bikin biachimtu dingah Dr. Sang Hlei, Salai Dr. Khin Maung Thein le Salai Za Bawi Thawng an si lai ti zong kan theih.

“Kannih CYO cu aa thawkka lawng kan si tikah dengteo in EC van i thim colh khi a si deuh lai lo ti kan ruah. A sullam cu CYO timi zong a theihngal lomi tampi kan um rih lai caah khi ni i thimnak kan tuah hlan deuh ah CYO kong tete biachimtu ding zong kan thiah hna. Dr. Sang Hlei nih Mino le Tuanvo, Salai Dr. Khin Maung Thein nih atu lio Kalay-Kabaw mino kong — fellowship cio le chiat/that bu pawl kan dirning kong pawl, Salai Za Bawi Thawng nih vawleicung i CYO a rak i thoknak kong le zeitindah kanmah CYO-KK le CYO Center pawl kan i pehtlaihnak ning chimnak an ngei te hna lai” tiah CYO-KK EC pakhat nih The Chinland Post ah a chim.

CYO-KK cu a luancia 2016 kum October 22 ni ah Kalay khuachung Mino 70 leng nih Van Bik Memorial Church (VMBC) ah rak dirhmi bu a si. Kum khat a si hnu 2017 kum November thla ah Kalay pengkomh zung (Kalay District Administration) nih theihhngahpinak Register zong a pek cang hna tiah kan theih.+++

About The Author

Na ruahning rak langhter ve.. (Leave a comment)

%d bloggers like this: