Kalay in Laitlang lei ah SAC ralkap mawṭaw 24 a kai
Kawl ralhrang Truck hmantlak (Reuters)
The Chinland Post | 2022 June 29 – SAC ralkap mawṭaw a nganmi 23 le a hmemi 1 cu June 29 zinglei sml 11:00am hrawng ah Kalaymyo in Laitlang lei ah a kai tiah Zalen nih a langhter.
Mawṭaw tam deuh cu eidin an phor i mawṭaw 4 ah thing le rua pawl an phor. Adang mawṭaw 3 ah SAC ralkap pawl an um tiah theih a si.
June 27 zinglei ah Kalaymyo in Laitlang lei ah mawṭaw 5 a kai i mah mawṭaw pawl cu atutiang Kalay-Falam lamcung i Zawng Kawng khua ah an um rih ko tiah a langhter.
Cun Mandalay in Kalay vanlawng ṭumnak ah ralkap vanlawng in thazang a chap tiah theih a si. June 28 zong ah Kalay vanlawng ṭumnak ah ralkap vanlawng voihnih a ṭum cang i upa pawl an i cit lai tiah ruahdamh a simi vanlawng hmete pakhat zong a ṭum tiah theih a si.
June 26, 27 le 29 zong ah SAC ralkap helicopter cu Hakha khua LIB 266 ah voi 3 a ṭum i Helicopter nih khua hel in aa chawk lengmang tiah theih a si.
Hmanthlak : SAC ralkap pawl khuachung an rak i chawh lio hmanthlak hlun a si
