Kalay Khuachung A Bu In Mivelhnak Ah Salai Siang Lian Thang A Thi
TCP-Online| 2018 June 29| June 21 ni zinglei sml. 1 tluk ah Kalay khuachung ah a bu in mivelhnak in Chinpa Salai Siang Lian Thang a nunnak liam tiah thawng kan theih.
Salai Siang Lian Thang thattu pawl cu Kalay peng palek nih an kawl colh hna i suimilam 24 chung ah an tlaih khawh colh hna.
Salai Siang Lian Thang a thih ning le a thattu minung an tlaih ning kong he pehtlai in Kalay peng palek bawichang U Thet Naing Oo nih a tanglei bang in Eleven Media ah a chim.
“June 21 ni zinglei sml.1 tluk khan sii-inn ah ruak pakhat an rak phakpi. A lu le a khaa ruh hliamhma pu in a si. A zan ah aho nih a thah ti hlathlai kan tuah colh ve. Fawi in kan thei kho zau lo. Ruak hmuh a sinak pawng minung tampi kan hal hna. Ho nih an kan chim kho lo. Cu tikah, ruak hmuh a sinak pawng minung 4 – 5 hrawng ka zung ah ka auh hna i tha tein biaruahnak ka ngeihpi hna.
‘Keimah nih ka uknak hmun ah mah bantuk tih nungmi thawngpang hna hi um hlah sehlaw ti ka duh. Mah cucu mizapi himnak ding cem ah a si ko. Cucaah, tutan i ruak kan hmuhmi ah zeitin hramdomh in cithlat ning kannih Palek nih kan theih kho lo hih, nan theih cun kan bawmh ve uh’ tiah ka ti hna.
Cu tikah minung pakhat nih, cu pa aa tel ve rua ka ti tiah bia a van chuahpi. Cu tikah ‘cu pa’ a timi cu a inn ah kan va kal i kan tlaih. A rak si tak. Kan tlaihmi nih a hawile zong a phuan colh i aa zapi minung 7 kan tlaih hna”, tiah a chim.
A thihning kong he pehtlai in, “Zuu an rit ruang bik a si ko. A thimi hi mah zan ah a hawile pathum he an vakti. Motorcycle mawngh in an so a paw. Cun, anmah bantuk in zuu ri vemi bu pakhat motorcycle an rak mawng ve. Lam ah an i tong i khat le khat an i au kanh le an i vua hna. Cuti an i vuaknak in a thih hi si” tiah U Thet Naing Oo nih cun a chim.
Salai Siang Lian Thang (18) cu Falam peng Si Dihai khuami a si. Kalay ah motorcycle remh cawng in thla thum a um cangmi a si tiah kan theih.
Photo Credit; Chinlandtoday
