Kalay Khuachung Lamri Lonh In A Fongmi Inn Pawl An Hrawh

TCP-Online| 2018 September 8| Kalay khuachung lampi thluan pe 100 a kaumi cu Nylon kanttaza phah an timh caah lamri lonh in a fongmi inn pawl cu an hrawh hna.

Hiti inn hrawhpiakmi cu inn 6 an si. Nylon kattaza phah ding in lam ri tahpiak a si tikah inn ning deng in a lonhmi an um tiah Kalay pengkomh lam lei tuanvo ngeitu Director chang U Khain Wai Lyin nih a chim.

Kalay khuachung i lam an tahnak hi Tadaoo in Sain Merry sianginn tiang lawng tahpiak an si rih. Mahti tahpiak an si hlanah tah an timhmak lam kam um inn vialte sinah ca in ralrinpeknak zong an tuah.

Hiti lamri lonh in a fongmi inn vialte an hrawhpiak hna tikah cozah lei nih bawmhnak pakhat hmanh zong an pek lo. Fur caan lio a si tikah inn dornak hmun zong a har rih ngai ti inn hrawhpiak a tongmi hna nih an chim.

Hi kong he pehtlai in U Khain Wai Lyin nih “Cozah lei nih tangkaa zeihmanh kan pe hna lai lo ti cun tuanpi khan an theih awk hrim a si ko. A ngaingai ti ahcun upadi ning in kan kal tak si cun taza kan cuai lai i hramhram in kan hrawhpiak ding khi a si. Cu pinah anmah lehlam tu tangkaa zong kan liamter ding khi a si. Nain, tuni tiang ahcun taza zong kan cuai hna lo i anmah inn ngeitu lila nih anmah tein an inn zong an hrawh ko, lamri lonhmi cu” tiah a chim.

Kalay lam thluanpi Nylon in a thar tuah dingah hin cunglei cozah nih meng khat kar ah Kyats nuai 654, tilu luannak pawl tuahnak ca ah Kyats nuai 373 le motor parking nakding caah nuai 208 pek an si. Mah cucu Kalay in 9miles tiang a si lai caah tangkaa nih a nguh tawk in tuah kan tim ti zong U Khain Wai Lyin nih cun a chim.

Ref; Khonumthung

Na ruahning rak langhter ve.. (Leave a comment)

%d bloggers like this: