Kalay Le Tamu Ah Zawngtah Kawng Khat Ks. 1000 Tluk A Phan
TCP-Online| 2018 February 25| Tulio Kalay le Tamu peng ah zawngtah thei a zat saling le zuar saling lio a si i chawlet pawl le zawngtah kung ngeimi caah tangkaa an hui lio caan zong a si.
Kalay le Tamu peng i zawngtah cu an tam tuk tikah khuachungmi nih ei cawk lo tiang a ngeih i India ram lei tiang hna an zuar ti kan theih.
“India ram Manipur ramkulh ah hin a bikin kan zuar tawn. Kum fatinte kan zuar tiawk a si. Manipur lei i zawngtah a kan cawbiktu cu Kate (Meitei) miphun an si” tiah Tamu khuachung zawngtah zuarmi pakhat sinin kan theih.
Kalay pengkomh chung ah Kalay le Tamu peng hna hin zawngtah thei a chuak tam bik i hi chung hmanhah Tamu peng in tam khun a chuak tiah theih a si.
Zawngtah a man cu kawng khat ah 400-500 kar a si i a tha deuhmi le a mui ai dawh deuhmi zawngtah hna cu kawng khat 700-800 tiang a phan. India lei i kuatmi zawngtah cu buri dip thong leng peng voi khat kuat ah kuat an si tawn i dip khat ah kawng 900 ai tlum.
Kalay pengkomh chung i zawngtah cu kum chiarte January thla hramthok in April thla tiang a cut saling lio a si i March thla ah a tam khun. Zawngtah in chawlehnak a tuahmi pawl cu zawngtah hmun (dum) chung i zawngtah thei lawng nih an zat lo caah khuachung i zawngtah kung a ngeimi hna sin zongah an va cawk tawn. Khuachung i zawngtah thei an cawk ning cu zawngtah kung khat ah sing 2-3 kar in a no lio (a rah kaa) tein an cawk i zawngtah thei a zat tikah a kung ning in a thei cu voi khat ah an lawh dih tawn hna.
Ref: KM
About The Author
