Kalay peng ah bom puah hnawh a tongmi SAC ralkap 35 an thi
The Chinland Post | 2022 April 12 – Sagaing ramṭhen, Kalay peng April 10-11 ah SAC ralkap mawṭaw thluan cu voi tampi bom kan puah hnawh hna caah ralkap 35 nak tlawm lo an thi tiah PDF-Kalay nih a thanh.
Kalay peng, Chaungkhan khua lei ah a kalmi SAC ralkap mawṭaw thluan 20 cu April 10 zaanlei sml 4:00pm hrawng Panmon hlei pawngah mipi hriamtlai phu hna nih bom an puah hnawh hna. Zaanlei sml 6:30pm hrawngah Chaungkhwa le Natchaung khua pawngah SAC ralkap le mipi hriamtlai phu hna karlak ah kahdohnak a chuak ṭhan caah SAC ralkap 2 an thi tiah theih a si.
April 11 zing sml 6:00am in zaanlei 3:00pm tiang Natchaung khua ah hmunhma a khuarmi SAC ralkap le mipi hriamtlai phu hna karlak ah kahdohnak a chuak ṭhan i SAC ralkap 6 an thi.
Zaanlei sml 3:30pm hrawngah Natmaung khua in Thasi khua ah ke in a kalmi ralkap pawl mawṭaw cung an kai lioah mipi hriamtlai phu hna nih bom 24 in an puah hnawh hna caah SAC ralkap 10 an thi tiah theih a si.
SAC ralkap mawṭaw thluan cu Thasi le Inkya khua karlak ah mipi hriamtlai phu hna nih bom 29 in an buah hnawh ṭhan hna caah SAC ralkap 9 an thi.
Chinsai le Zinkalin khua ah a phanmi SAC ralkap mawṭaw thluan cu mipi hriamtlai phu nih bom 12 in an puah hnawh hna. SAC ralkap 5 an thi tiah theih a si.
Cun, Kalay Technology University lei ah kahdohnak tuahding in a kalmi SAC ralkap 30 zong April 11 zing sml 10:00am ah Zinkalin khua le Kalay Technology University karlak ah mipi hriamtlai phu nih bom an puah hnawh hna i SAC ralkap 3 an thi. SAC ralkap mawṭaw thluan cu Kalay khuachung ah a lut tiah PDF-Kalay thawngthanhnak in theih a si.
SAC ralkap mawṭaw thluan cu PDF-Kalay, CNDF, CDF-KKG le mipi hriamtlai phu hna fonh in kahdohnak tuah a si i SAC ralkap 35 nak tlawm lo an thi lai. Mipi hriamtlai phukomh in minung 3 nih hliamhma an tuar tiah theih a si.
