Kalay peng ah SAC ralkap le mipi hriantlai phufonh karlak ah kahdohnak a chuak, PDF 2 an nunnak a liam, SAC nih Sii khua mei an khangh.
The Chinland Post | 2022 May 2 – Sagaing ramṭhen, Kalay chaklei ah a ummi Sii khua ah SAC ralkap le mipi hriamtlai phufomh hna karlak, May 1 ah chunitlak kahdohnak a chuak, a naih tein i kah a si i PDF 2 an nunnak a liam, SAC ralkap nih Sii khua mei in an khangh tiah theih a si.
“Nizaan Sii khua ah zinglei 8:00am in zaan tiang kahdohnak a chuak. SAC ralkap pawl an thazang a tam. PDF-Kalay, RKDF, CDF-KKG le mipi hriamtlai phu hna fonh in kan doh hna. SAC ralkap thazang a tam caah VAKOK (CNDF) nih kan va bawmh hna. SAC ralkap pawl Sii khua chung an luh cang caah a naih tein kan i kap. SAC ralkap nih kut hlonh bom hna in an kan cheh. Kuan nih a khen ruang ah RKDF in 1, PDF in 1 an nunnak a liam. Kan mah lei phu fonh hna nih tlawmpal hnu kan kir tak hna” tiah VAKOK (CNDF) commander nih Yangon Khit Thit ah a chim.
SAC ralkap nih mei an khangh ruangah Sii khua inn tampi a kaang tiah thawng theih a si.
Sii khua pawng, April 27 ah SAC ralkap le mipi hriamtlai phufonh pawl karlak ah kahdohnak a chuak i phufonh hna nih hmunhma zohfelnak an ngeih lioah SAC ralkap ruak 7, meithal 1 le kuan an rak fim khawh.
SAC ralkap pawl an sungh tuk caah thazang i chap in April 30 – May 1 tiang kahdohnak a fah hi a si.
