Kalay peng, Helauk khua kahdohnak ah SAC ralkap 10 an thi, PDF 1 a nunnak a liam
The Chinland Post | 2022 June 23 – Sagaing ramṭhen, Kalay peng, Helauk khua, June 22 zinglei ah SAC ralkap le mipi hriamtlai phu hna karlak ah kahdohnak a chuak i SAC ralkap 10 hrawng an thi, PDF-Kalay hriamtlai 1 a nunnak a liam tiah Chinland Defense Force – Kalay-Kabaw-Gangaw nih thawng a thanh.
June 21, Kalay peng, Natchaung khuate ah a riakmi SAC ralkap 100 hrawng cu June 22 zinglei ah Kalay peng thlanglei ah ke in an kal i Helauk khua an phak lai ah timhcia tein a bawhmi mipi hriamtlai phu pawl nih an kah hna caah SAC ralkap 10 hrawng an thi i tampi nih hliamhma an tuar i PDF-Kalay hriamtlai 1 a nunnak a liam, Vakok (CNDF) hriamtlai 2 le PDF-Kalay hriamtlai 1 hna hliamhma an pu tiah theih a si.
Tutan ah CDF-KKG battalion 3, PDF-Kalay, Vakok (CNDF), RKDF le People Defense Force pawl fonh in kahdohnak an tuahmi a si tiah CDF-KKG nih a langhter.
About The Author
