Kalay Peng Hmandaw Khua ah Chin National Day An Tuah
Kalay peng Hmandaw khua ah Hmandaw Sianghleirun le khua Mino hruainak in a kum (71)nk Chin National Day (Chin Miphun Ni) cu February 20, 2019 Hmandaw ah sunglawi ngai in an tuah tiah theih a si.
“ Hi kan tuah hnawchan cu kanmah khua caah miphun kilven le sunsak lawng silo in Chinram khua te dihlak nih Chin Miphun Ni hi sunglawih ve in tuah cio hna seh tiah saduhthahmi a si. Kan voikhatnak a si i kumchiar pehzulh kan tim” tiah Hmandaw Sianghleirun chungtel a simi Salai Biak Lian Ceu nih The Chinland Post ah a chim.
Chinmi (Laimi) khua nih kan miphun kilvennak a herhtuk caah CND hi tuah cio kho dih usih law a tha lai. Khuakip cio nihhin lentecelh ni (sport day) tbk kan ngei theo i khi bantuk khi CND caan te ah kan tuahpiak kho hna sehlaw a tha tuk hnga. Kan miphun nih cu kanmah Laimi hrim nih kan sunsak a hau hrimhrim mi a si. Cozah lei nih zungkhar ni ah an duh lomi zong hi Laimi kan dihlak kan lungrualnak le miphun sunsaknak lungput a thawn a si ahcun CND cu zung khar ni ah an kan tuahpiak te ko lai tiah a biapeh ah a chim.
Hi puai ahhin Khuabawi biachimnak, mino upa biachimnak le CND biachim tu ah Saya Lian Cung an si i Chin thilthuam hmuhsaknak, ruakhuangtlak tel in lam phun 4 leng, hlasaknak tbk hna an tuah, puai zawhtu minung 500 reng lo an si tiah theih a si.
Kalay peng Hmandaw khua cu inndong 400 fai an ummi Lai khua a si. Kawl inn 14 hrawng an um tiah theih a si.
About The Author
