Kalay peng, Sii khua cu SAC nih an khangh dih, mipi 3 zong thah an tong
The Chinland Post | 2022 May 4 – Sagaing ramṭhen, Kalay peng, nichuah lei Sii khua cu SAC ralkap nih May 1 thok in an luh hnawh hna i an khua ning piin an khanghpiak hna lengah khuami 3 zong an thah tiah khuami hna nih Yangon Khit Thit ah an chim.
SAC ralkap pawl cu nichuah lei Sii khua i hmunhma an khuarnak sianginn le phungki sianginn telh loin mipi inn zapi tein an khanghpiak hna. Nichuah lei Sii khua hi inn 900 hrawng khua a sa mi khuate ngan pakhat a si.
“Kalay peng, nichuah lei Sii khua cu SAC ralkap nih mei in an khangh dih, inn 900 hrawng khuasa an si. May 1 le May 2 ah khanghpiak an si. A mah ning tein a tangmi inn 3 lawng a si. SAC ralkap nih mipi thilrii mansung vialte fir dih in mei in an khangh hi a si. Khuami 3 zong an thah chap hna. Khua chungah a hohmanh an kir ngam ti lo” tiah khuami pakhat nih a chim.
SAC ralkap nih April 27 in nichuah lei Sii khua ah kahdohnak an thok i mipi hriamtlai phu pawl he kahdohnak a chuak. SAC ralkap lei a thimi an tam caah nichuah lei Sii khua an khangh dihnak hi a si tiah theih a si.
May 3 ah SAC ralkap nih helicopter in kahdohnak a tuah i ralzaam pawl zong a kah chih hna caah eidin le ṭhutumnak lei bawmhnak an herh ko tiah theih a si.