Kalay-Tamu lam cungah SAC ralkap bom puah hnawh an tong, 15 an thi
The Chinland Post | 2022 August 1 – Kalaymyo in Tamu lei ah a kalmi SAC ralkap mawṭaw cu July 30 ah PDF-Kalay nih Kalay-Tamu lam cungah voi 3 tiang bom an puah hnawh hna i SAC ralkap 15 an thi tiah theih a si.
Tamu lei ah a kalmi SAC ralkap mawṭaw 4 le ke 12 a ngeimi mawṭaw pakhat cu PDF-Kalay nih mengtung 56 pawngah voikhat, Naykyawlay pawngah voikhat tiah voi an puah hnawh hna i SAC ralkap mawṭaw 4 a rawk i SAC ralkap 10 an thi tiah PDF-Kalay nih a thanh.
A thimi SAC ralkap ruak pawl char ding in Kalay lei in a rak chuak mi mawṭaw 2 cu bom an puah hnawh ṭhan i SAC ralkap 5 an thi chap, tampi an i hliam tiah PDF-Kalay nih a thanh.
Bom ruangah hma a pumi le a thimi pawl cu ke 12 ngei mawṭaw cungah an khin hna i Kalay lei ah an kalpi hna. A taangmi SAC ralkap pawl Tamu lei ah an kal.
Cun SAC ralkap nih mengtung 56 rose pangpar dum pawng mipi 3 le Naykyawlay pawng lamkam rawleinak dawr i mipi cheukhat an tlaih hna tiah PDF-Kalay nih a thanh.
Kahdohnak ruangah Kay-Tamu lam cu zaan sml 9:00pm in zinglei sml 5:00pm tiang umkal lo ding in PDF-Kalay nih a thanh.
About The Author
