Kalay Tikhur Ti An Reu Ruang Ah Dinti Kong Ah Harnak An Tong
TCP-Kalay| 2019 May 2| Kalay peng ah khuachung tikhor ti an reu ngai i dinti kong ah an buai ngai tiah thawng kan theih.
Hlan ah cun mah le innhmun cio ah pe 12 hrawng vawlei tangchuak Ti a chuakmi cu nihin ah cun pe 200 hrawng vawlei cawh hnu lawng ah ti a chuakmi hmundang sang an um cang.
Kalay um inn vialte ah inn 72,769 ah Pipe in ti a lami 1,917, Tikhur ah pipe a hmangmi 23,778, Tikhur ah piple le mirang vawlei a hmangmi 34,890, Tikhur ah zeihmanh a ruallomi 5,949, Tibual ti 51 Tivati 3,792 , Ruahti 227, Dinti thiang a hmangmi 86, Tiphorhnak motor a hmangmi 160, adangdang 1920 an um tiah kan theih.
2015 July le August thla chung ah kokek harton ruang ah Chinram ah inn 4,000 a rawk i a milu in 23,000 tluk an si. Cu lioah Kalay zong ah Inn le Lo tamtuk a rawk.
Tikhor ti a reunak kong he pehtlai in “2015 kum in Kalay peng khuachung le khua te kip ah Ti harnak kan tong. Pawngkam thil sining aa thlen ruang ah a chuakmi thil lakah tihnung bik pakhat kan ton ko cang” tiah Kalay khua upa pakhat nih TCP ah a chim.
Nihin kan vawlei ah Ti a harnak, Ti a reunak kong he pehtlai in Dr. K. P. Johanan nih, “Nihin vawleipi nih a tih bikmi hi nuclear power asi lo. Terrorists (Ralhrang) zong a si lo. Cun HIV/AIDS zawtnak zong asi fawn lo. Nihin vawlei nih a tih bik mi cu “Dinti” kongkau asi,” ati. Vawlei i 70% nak tamdeuh hi ‘ti’ nih a khuh. ‘Ti’ dihlak i 97.4% hi din awk a tha lomi Rili ti asi i din awk a thami cu 2.6% lawng asi. Kumkhat hnu kumkhat ti a tlawm chin lengmang. A rak reu bal lomi tiva zong thal caan chuah cun an reu cang.
A ruang cu thing hau ruang, sehkhu le meiduah ruangah asi bik. ‘Ti” a tlawm tikah cinmi thlairawl a chuakmi zong a tlawm chin ve. Tahchunhnak ah, leithuan te hna a har chinchin. Sivai, hrudenh le sehkhu, dynamo le bomb puah ruangah ti a thur (a hnawmtam).
India ram tiva dihlak i 70% hi a thur cang, Tuluk ram tiva i 78% hi minung caah tih a nung, Malaysia ram tiva 116 chungah 27% lawng hi a thiangmi asi an ti. Ti a thurhnawm tikah nga zong an ci a mit i Acid ruah tiang a sur caah cinthlakmi tirawl a rawh pinah vawlei dawm (Natural fertility) a hrawh. Europe ram i 35% cu thei cinnak ah a tha ti lo. Europe ram lawng si loin kan Lairam hmanh ah thei/rawl a chuak ve ti lo.
Facang pung (1) tuh ah a luancia mi kum hra lio ah zeitluk in dah a chuah, a tu ah tah zeizat dah a chuah, tuak law, na fiang ko lai tiah a chim.
About The Author
