Kalay University Ca Ah Chin Ram Vawlei Tahnak An Tuahmi Zatlang Bu (30) Leng Nih An Doh

TCP-Online| 2018 September 20|  Chin ramkulh Tedim peng Siyin thinghram um vawlei ekah 300 leng cu Kalay University Campus caah vawlei tahnak an tuahmi kong ah zatlang bu (39) nih fak ngai in an doh hna.

A luancia September 5 ni ah Chin ramkulh Tedim peng Siyin thinghram vawlei cu Kalay University Campus ah lak dingin vawlei ekah 308.56 cu Khaikam khuabawi, Tedim peng vawlei hmun tahtu zung in vawlei lei tahnak tuanvo pekmi Khaikam vawlei tahnak zung lutlai, Khaikam sipin Chairman, thinghram lei zung le Khaikam no.2 khuabawi hna tiin vawlei tahnak an tuahmi kongah Chin Students’ Union nih September 17 ni khan Kalay khuachung Youth Center ah thawngfiannak an tuah i zatlang bu 39 zong nih an duh lonak kong cathanh an tial cio hna.

Cuti an tuahmi ahcun atu chan zaukphung lei aa kal cuahmah mi kan ram ah fawite in riantuan an timh mi, miphun idohnak tel in tlangcungmi lungrualnak a hrawk kho ding pawl tuah lo ding le, Kalay University min cu a hmasabik ah min rak sakmi Khaikam University ah an thlen naklai thawngfiannak an tuahnak an chim.

Kalay University campus cu ekah 358 a kaumi a si i, mah pinah Chin ram vawlei ekah 308.56 zong Kalay University campus ah umter dingin University lei nih July 23 ni khan Tedim peng ah bawmhnak an hal.

Hi konghe pehtlai in Chin ramkulh Minister Mang Hen Dal nih “Mah hi cu ramri kong a si caah ramkomh cozah lei nih tlangtlak in ramri chinchiahnak hna an rak tuahawk a si. Kalay University zong nih fawite in mah hi kan pek uh tiah an ti kho lo. Ramkomh cozah nih ramkulh cozah he biaruah a si hnu lawngah tlangtlak awk a si” tiah a chim.

Chin ramkulh le Sagaing ramthen ramri chinchiahnak cu atu tiang ah fiang in tuah khawh a si rih lo caah pu pa chan lio i vawlei kan rak ngeihmi zong dik fel tein an tah than i atu Kalay University Campus zong hi a tah than a herh ko tiah mah ni thawngfiannak an tuahmi ah  zatlang bu 30 leng nih cun an chim.

Ref; Khonumthung

Leave a Commnet

%d bloggers like this: