Kalaymyo Covid 19 Hrik Ngei (142) Chung In Minung (111) Nih Damnak An Hmuh

Salai Bawi Lian Sang|TCP-Kalay| November 18, 2020| Sagaing ramthen, Kalaymyo peng ah a voihnihnak covid-19 thlihrang ah zawtnak hrik ngei(142) chung in minung(111) nih damnak an hmuh. A dang hrik hmuh minung (31) cu Kalaymyo itkhun (300) Siizung um Taingyin(Traditional Hospital) siizung ah minung(17) le Kawlkulh khua mipi umnak caah sakmi innthar ah minung(14) hna cu sii thop in an um lio tiah thawng theih a si.

“Siizung in a chuak cang mi zong dam in an um cio hna caah ngamdamnak le Lentecelhnak minister zung nih rikhiah mi ni (11) chung zawtnak hrik a lang ti lo ruangah siizung in an chuak khawh nak a si. Siizung in a chuak cang mi zong home quarantine zarhkhat erh an si than dih. Kalaymyo peng ah a voihnihnak covid thlihrang a thok than ruang ah covid-19 zawtnak ngei (142) chung in September-October thla lio ah Sanmyo sang ah minung (23) hrik ngei an um. Sanmyo Sang block No.(4) le (6) cu Semi lockdown tiang rak erh an si. October 12 ah an dam dih cang caah lockdown in on piak an rak si cang. Nihin Kalaymyo khuachung sang ah cun hriktam bik an hmuhnak cu, Tat-oo Tida sang, Aung Titsa, Aungmingalar, Chainmeihaungsi, Tarzin sang hna an si” tiah Pu Ni Lian Sang(Pulrai runvennak committee chungtel) nih TCP a chim.

November18 tiang ah Kalaymyo peng chung in Quarantine Center 19 a um cang. Khuchung Quarantine ah Kanpale, Aungthitsa, Kawlkulh, Chianmeihaungsi, Kalay University, Siangsangrun No. (1), Siangsangrun No.(8), le Tida Ku Mit sizung(1), Nursing School(1) le Quarantine Facility le Shin Hon Hotel Quarantine hna an um. Ref: Kalay Township News