June 22, 2025

Kalaymyo, Duwaichaung Kahdohnak Ah Mipi 4 An Thi

0
Do-wai-chaung kahdohnak ah mipi 4 an thi_2023 Nov 23

The Chinland Post | 2023 November 23 — Sagaing ramṭhen, Kalaymyo in Latpanchaung lei kalnak lam kam ah a um mi Du-wai-chaung khua ah hmunhma a khuar mi ralkap sakhaan cu dothlennak phu pawl nih November 21 ah an kah hna i ralkap lei nih hriam le minung thazang an rak chap caah dothlennak phu lei an zaam manh tiah theih a si.

Kahdoh a chuah hnu caan tlawmpal ah ralkap lei nih hriamngan, meithal hna an thlah thlorh caah hngakchia 1 telh in khuami 4 an thi tiah Zalen nih a langhter.

A thi mi hna hi Pu Lal Huam Lian Thanga (kum 49), Pa Mung Sawm Sang (kum 4), Pi Van Ram Par (kum 28) le Pu Gin Lian Tuang hna an si tiah theih a si.

Kahdohnak a chuah ni ah Pu Lal Huam Lian Thanga le Pa Mung Sawm Sang ruak hna an lak khawh nain Pi Van Ram Par le Pu Gin Lian Tuang ruak hna cu an la kho rih lo tiah theih a si.

Pi Van Ram Par hi fa pathum an nu a si i a thla lawng a si rih mi, hngakchia hnuk a dinh lio ah a lu ah kuan nih a khen. A ruak hi nizaan (November 22) zinglei ah an lak khawh i an thihnak hmun in thlaan ah an kalpi colh i chun sml 2:00pm ah an vui tiah theih a si.

Pu Gin Lian Tuang hi kahdoh a chuah bak in a thihnak hmun in tuzing lawng ah an lak khawh tiah theih a si.

A thi mi Mung Sawm Sang a nu hi a keng ah hliam a tuar nain a dam deuh cang nain thla 1 leng aa dinh a hau tiah Doctor pawl nih an chim i a u nu zong a ban ah aa hliam i Yangon lei ah ii thlop ding in Doctor pawl nih an chim tiah Zalen sin in thawng kan theih.

Leave a Reply

Your email address will not be published. Required fields are marked *