Kalaymyo khuachung Sanmyo Sang pakhat Ah Covid-19 Hrik ngei 13 an um

Salai Bawi Lian Sang| TCP-Kalay| 2020 October 4| Kalaymyo khuachung sang pakhat a simi Sanmyo sang ah Covid-19 hrik ngei mi(13) an um tiah MP Pi Siammi nih a facebook ah a tial. Sanmyo sang cu Kalaymyo peng ah Covid-19 hrik a tambik le neihniam bik minung tam an um nak sang a si caah Sangchung um mi vialte cu Stay at Home ah September (29) ni thawk in chiah an si dih. Sangum mipi pawl din-ei kong ah Ngandamnak le tuanvo ngeitu volunteer nih tuanvo an lak tiah thawng theih a si.

Kalaymyo ah a voihnihnak Covid-19 ruang ah October (2) zan tiang hrik ngei Siizung kai mi 27, ai thlawp lio mi 23, sizung in a tummi 4 an si. October (3)zan cun, Swab test mi chung in zawtnak hrik thar an um lo tiah thawng kan theih.

Kalaymyo peng chung ah Covid -19 pulral ruang ah Quarantine Center 11 a um cang. Khuchung Quarantine ah Kalay University, Siangsangrun No. (1), Siangsangrun No.(8), le Tida Ku Mit sizung(1), Nursing School(1) le Quarantine Facility(4) um. Ram dang tlungmi (135) ah pa(67) le Nu (68), Ramchung peng dang tlungmi(135) ah Pa(50) le Nu(52) an dihlak Quarantine lut mi(257) an um.

Sanmyo sang ah innchungkhar(1650) le milu (8900) hlei an um. Sanmyo sang Stay at home an chiah cang caah mah sang he naihniam mi Taungpila sang, Tharzin sang, Tuangzalet sang, Tahan sang, le Kawlkulh khua vialte lam khar dih ding in sang volunteer, Meithat, sang khuabawi vialte hna nih humhinnak le ei-din kong tuanvo an lak lai.