Kalaymyo Mawleik Thonginn A luatmi Chung In Chinmi 31 An I Tel
Salai Bawi Lian Sang\TCP\Kalay
April 20/2020
Kawlram President nih April 19/2020 ni ah tongtla pawl dawtnak in a luatter mi Kalaymyo-Mawleikkalay thonginn chung in Chin mi cheukhat zong an um. Mah hna cu:Hakkha in 2, Thantlang in 3, Falam in 3, Tedim in 9, Tonzang in 10,Rihkhawdal in 3 le Khaikam in 1 an dihlak 31 an i tel tiah thawng kan theih.
Kalaymyo Mino pakhat nih thongtla pawl kalaymyo khua a si lo mi hna cu Khuachung zatlang bu CSO le Yaungni Maha kungka bu hna nih thongtla pawl an umnak peng cio ah an thlah hna tiah a chim.
Mah thonginn he pehtlai in Dr. Neh Kho Lal nih “Thongtla mi chungkhar hna nih thongtlami an rak veh tik hna ah riaknak zong a um lo. Lamhla in an ra mi caah mah bantuk riakbuk kan tuah hi a si.Cun miphun tleidang lo tein mizei poah a lak in riak khawh a si” tiah a chim.
“Mi cheukhat cu thongthlami an rak veh hna tik ah harnak an ton.Inn lei tlungnak a ngei ti lo mi zong tangka kan bawmhmi hna an um i thongtla chungkhar hna caah canphio le thinginn te saknak cu 2017 kum in hram kan thok.Tu kum in Concrete in pe 40,pe 30 in inn dothnih kan sak i khaan 4, coka le mileng khan pawl an um,” tiah Kuku Christian bu Dr. Neh Kho Nal nih a chim.
“ Mah riakbuk ah miphun thleidangnak um lo in a lak in tlun khawh a si. Pastor pakhat chungkhar nih ti le rawl an chumh piak hna,” tiah a chim chap.
Thongthla chungkhar riakbuk saknak ding caah ahlei in Kuki Baptist Association le Myanmar Hope Mission komh in an tuah mi a si tiah thawng kan theih.
Nihin Mawleik-kalay thonginn ah thongtla mi 2000 hlei an um i mah thonginn cu Kalaymyo le Tamumyo karlak ah a um mi thonginn pi a si.
About The Author
