Kalaymyo peng Hakhalay Khuachung Lam Mei A Ceu Cang

0

Hakhalay Lam Electric/thunlin

Salai Bawi Lian Sang| TCP-Kalay| November 19, 2020| Kalaymyo peng Hakhalay khua ah November 19 zan in lam mei a ceu cang. Hakhalay khua chung lam kam orh lei (Natchaung in vunratnak) kip ah pe (100) dan ah meitung pakhat cio a um. Mei Transformer electric volt(11,000) an bungh. Mei onnak ah Kalaymyo peng Region No.(1) MP Thanh Wai Kyaw le peng Electric lutlai a hawi le zong an ra i bia chimnak an ngei. Khuami nih vok hangsoh in zanriah dumtinak zong Hakhalay Hall ah kan tuah tiah Pu Tun Lin@ Ram Ceu Thawng(Hakhalay Mino Bu-President) nih TCP ah a chim.

“A tu cozah Lam mei ceu khawhnak ding ah innkhat kyat 240,000 kan pek hna. Thlakhat ah kyats 20,000 in kan pek. Lam mei cu a ceu cang ko i hmaithla lei ah cun innkip (meter box) mei a ceu cang ko lai. Kan khua tlaknak hi kum (102) nak a si cang hi a tu zan khua chunglam mei a ceu tik ah khua mi kan i lawm tuk. 2020 kum Hakhalay ah inn (200) hrawng le milu 1150 khua sa kan si. Khuachung ah Chin miphun chung in Falam, Hakha, Thantlang, Mizo kan um. Khua thanchonak lei ah Sianglairun(1), Foundation Fund, le Myaseinyaung planning hna kan ngei hna. Khua bawi ah Pu Sui Lian Thawng” a si tiah Pu Tun Lin nih a chim.

Kalaymyo peng 2020  kum hram thok in a voikhat nak lam area ah mei thlai ding tiah an ti.Kalay Airport in nitlak lei Kalay-Tahan karlak lam mei tung kip ah Grace Light Lighting Solution, Supply Services nih tuanvo lak in mei tung bungh in mei a ceu dih cang.

Aluancia mi 2015 kum thimnak ah Kalaymyo milu 379,132 le innchungkhar dihlak ah 76,773 ah methla kho mi 23,5231 an rak si. 2020 kum in thimfung (mee) a thla khomi dihlak 276, 882 an si lai.Mah chung in Chin miphun chungin me a thla kho dingmi 130,000 asi. 2015 thimkumnak in 2020 ah thimfung methla kho mi 41,651an karh deuh  tiah TCP nih  thawng kan theih.

About The Author

Na ruahning rak langhter ve.. (Leave a comment)

%d bloggers like this: