Kalaymyo Peng Region (No. 1) In CNLD Party MP Candidate Pu Chan Bik Lian Konglam

0

Salai Thomas Lian| Kalaymyo| Pu Chan Bik Lian cu (Taing Detah Kyi No.1) Kalay Peng Region No.(1) ah CNLD Party in thimnak a lut ding a si. Aa zuamnak ding hmun hi khuate-komh 36 an um i, Vote pe khotu Chin 40,000 hrawng le Kawl 60,000 hrawng an um tiah theih a si.

Pu Chan Bik Lian Konglam tawi

Chan Bik Lian cu 1966 March 9 ah a chuak i, Kalaymyo ah khuasa mi a si. Pu Phun Hlam(Lamtuk khua,Halkha peng) le Pi Kai Ve hna i fale 10 lak ah 6nak a si. Ka innchungnu hi Pi Sui Thlia(Ruavan khua) a si i, fapa pahnih an ngeih hna. 1986 kum State High School Halkha ah taanghra a awng. Cun Acozah rian a tuan pah in Emmaus Theological Seminary ah B.Th Degree le M.A (Theo) Degree a la. 1990 kum in Acozah rian Forest Department ah kum 6 a tuan. Cu hnu Pyin Oo Lwin ah Forest Department Training (1996-98) a kai. Training a dih hnu ah Officer in caan saupi a tuan i, 2018 ah pensen a la. Acozah rian ka pensen hnu in CBA (Chin Baptist Association) ah Auditor, Salem Baptist Church ah Church President le CNLD (Kalay) Vice Chairman tuan liomi a si.

CNLD Party a luhnak

– Pakhatnak ah CNLD Policy zong a duh i, Party CEC ahhin Chin miphun lawngte an si. CEC ah Chinmi tel lonak Party dang ahcun Chin miphun konglam an thei kho lai lo i, CNLD nih cun Chinmi caah rian an tuan khawh deuh lai.

Pahnihnak ah Party pathum(CPP, CLD le CNDP) timi an i fonh khawh ca ah a si. Cun Chin miphun a ttanhmi a si caah a si. Tlangcungmi dang nih Party an ngei cio i, Chinmi tuanbia ca hrimhrim ah Chin Party cu um a herh.

2020 thimfung ah teinak a hmunh khawh ah cun aa timhmi Saduhthat

– 2020 thimnak ah teinak ka hmuh ahcun Kalaymyo mipi nih kan herhmi vialte kha Acozah rian pehtlai a si ahcun bawmh le tuah kho ding hrimhrim in kaa zuam lai. Cun fimcawnnak lei ah Degree la ciami Acozah riantuan an duh si ahcun riantuan kho dingin ka tuahpiak hna lai. Forest Department siseh Mee Cazin ah siseh hmun a lawngmi Acozah rian a tuan duhmi hna kha riantuan khawhnak ka cawnpiak lai i, riantuan ding a ngei lomi tete zong kha Acozah chung ah cawlcangh khawhning ka chimh hna lai. Khuate le khuapi tlukruang tein tlonlen khawhnak ah kaa zuam lai. Cun biaknak lei ah ka dirkamh lai.

– Chin Party a si bantukin Chin miphun paohpaoh nih Kawl party nakcun vote kan pek deuh ding a si. Adik a hmaanmi Federal le Democracy kan hngah khawh nakding caah Tlangcungmi nih kanmah le kan miphun cio hi vote kan i pek a hau. Myanmar zalonnak kan hmuh hnu in kum 70 lengkai Kawl nih an kan hruai. Savo tlawmpal cu an kan pek nain thanchonak taktak cu an tuan lo. Bianabia ah a hlan India nih Mizo, Naga khi direct in a rak uk hna. Nain atu cun mahte khuakhan lairelnak an ngeih tik ah an thangcho tuk cang. Myanmar ram chung Wah miphun pawl khi Laimi milu cheukhat hrawngte an si nain anmah te in an i hruai tik ah an thangcho tuk ti kha kan hmuh. Cucaah kan Chin Party cu Chin miphun vialte nih kan ttanh i vote kan pek dih lawnglawng ah kan thangcho lai i, kanmah tein kan i hruai kho lai.

CNLD cu Chin Miphun party a si i, Chin miphun cu 80% khrihfa kan si caah pakhatnak ah thlacamnak in rak kan bawm ulaw. Pahnihnak ah vote peknak in nan kan bawm lai i, pathumnak ah kan Miphun party kong a thei rih lomi tete zong kha vote pe kho dingin rak kan chimrel piak ve u. 2020 ahhin cun Chin miphun dihlak ttanrual kan hau cang. Kanmah tein i hruai ding kan si cang. Cun kei kaa cuhnak ding ahhin Party 7 in kan i cuh lai i, keimah lawng hi Chin ka si lai. Cucaah cun Kawl Party nakcun kanmah Chin miphun Party te hi vote rak pe deuh hram ko u. Ref: Rawn Chin Post- Weeklynewspaper

Note: Pumpak catialtu hmuhning ruahning a si.

About The Author

Na ruahning rak langhter ve.. (Leave a comment)

%d bloggers like this: