Kalaymyo Vanlawng Tual Khuachung I A Um Hi A Tha Maw?
TCP-Kalay | 2019 May 2| Kalaymyo vanlawng tual hi Kawlram ah khualai bik hmun a ummi a si. Kalay hi khua lianngan le inn le lo a karh ngaimi peng ngan pakhat a si bantuk in mah khuachung khua lai cem ah a ummi vanlawng tual ruang ah inn le lo kong le minung umkalnak a donh cang ti cu mizapi nih theih cio mi a si.
Kalaymyo vanlawng tualpi hi Vawleiral pi second world war II hnu 1946 kum ah Kalay vanlawng tual pi cu acres 85 kauh in nihin Lansung (Pinlong)sang ah an rak sak. Mah lio hrawng vanlawng an hmanmi ah The Union of Burma Airways (UBA) nih 1948 March 23 ah hunnak an rak tuah.
Hlan vanlawng tual cu BOC in Tadaoo tiang vanlawng tual pawng ummi hna cu ralkap chan lio ah Taungphila hmunthar lei ah inn hmun pek ding in khuakhan a rak si. 2010 kum April thla in Kalay peng uk hna nih Chin miphun chungin minung (7) ngeihmi leikuang acre (35.37) cu hramhram in an rak lakpiak hna. Nihin ni tiang cozah lei nih tangka in maw, vawlei in maw liamh le chamnak zeibia hmanh chawnh kan tong rih lo tiah an chim.
Mah an vawlei lakpiakmi cu innhmun (382) ah an samh. Sihmanhsehlaw inn (60) lawng nih inn an sak caah a tangmi innhmun cu nawlngeitu hna nih an zuar i town planning a um rihlo mi inn saknak caah an hmang.
“Vawlei ngeitu minung (7) nih an vawlei cu kan liamh hna seh tiah Penguk, Pengkulh le Chief Minister sin ah thawng kan thanh ko hna nain nihin tiang tlangtlakpiak a um lo caah rampi cozah sin ah report kan tuah than” tiah an chim.
2010 U Thein Sein (USDP) cozah kai hnu ah vanlawng certual cu Tada-oo Bazar pawng in No.1 Middle School, a hlan No.9 Primary school tiang an kauhchap caah mah hrawng inn le lo ngeitu hna cu nihin Taungphila tlang pawng ah hmunthar cu cozah nih an pek hna. Certual a kauh ah 79 meters (pe 259) le a sau, 1677 meters (5502 pe) an si. Kalay Airport hi Mandalay le Yangon he pehtlaihnak nitin in tlunkainak hmun a si. Kalay vanlawng tual ah a zuangmi line hi Myanmar National Airlines le Air KBZ an si.
About The Author
