Kan nun bu cun sunghnak he cun kan kir bal lai lo: Salai Ngun San Aung
Lai Pasal ttha hna…
Vawleipi uk khi kan i timhmi si lo…
Rili ral ah kal in mi hranchaw va lak dingah raltuk zong kan ithawh lo…
Thlanglei Africa ah va kal in raltuk i sal va tlaih ding in ral tuk aa thawhmi zong kan si lo…
Yangon le Naypyidaw ah va ttum in Kawl miphun hna va pen ding in ral a tho mi zong kan silo…
Teinak thantar he “Federal Democracy” tlunzoh iphurh in kan tlun tikah thutdan sang i thut te ding zongah ral a tumi kan si lo…
Cu nak cun…,
Pathian nih Miphun tling ah a kan ser ve nak in kan i ngeihmi kan ram, kan nunphung, kan caholh le kan biaknak hna sunhlawi le cawisan ve nak nawl kan ngeih i kan tappi le lungthu kongah kanmah tein khuakhannak nawl kan ngeih nakhnga le kan techin fapar hna chan ah mi ramdang i hlawhhlan le fimcawn len hau loin kanmah tappi khor te ah zalonnak taktak he an tlonlen khawhnak dingah kan hauhruang a vengmi kan si.
Chizawh a rat i a au len tung nain Pawpi a rat tik i a zaammi innhngak uico phun zong kan si lo.
“Nan tei lai maw…?” tiah a ka halmi cu hitihin ka leh tawn hna…
Kan tei le tei lo cu Pathian nih hna a kan tlakpi i kan Miphun dihlak kan tan ahcun kan tei ko lai.
Kannih cu kan tei lo zongah kan nunnak a dih tiang kan Miphun ven dingah aa thawhmi kan si.
Kan nun bu cun sunghnak he cun kan kir bal lai lo.
Kan ruak in kan kir sual le kan khuallam a pehtu hna cungah teinak hmuh le hmuh lo cu aa hngat te lai…
Salai Ngun San Aung
Biakilh: Salai Aung nih a pumpak Facebook ah a tialmi kan hun lak in zamh chin mi a si. Salai Ngun San Aung hi The Chinland Post ah Editor-in-Charge tiang a rak kan tlaih piakmi a si, amah pumpak hmuhnak a tialmi kan hun zamhchin mi a si. ~Editor
About The Author
