Kan Pu Le Pawl Nih Zung Kai Than Ding In An Kan Nawl Nain Kai Lo Ding In Biachahnak Kan Ngei_ GAD Zung In Tuanvo Ngei Pakhat

Salai David Van| TCP-Hakha| 2021 Febuary 10| Chinram kulh Hakha GAD zungah rian a tuanmi hna cu Febuary 10 ah CDM i tel in mizapi sin ah lamzawhnak an tuah hnu ah an pu le nih an auh hna i zung kai than dingin nawlnak an tuah hna nain kai lo dingin biachahnak an ngei tiah theih a si.

Hi kong he pehtlai in GAD riantuan chungin Civil Disobedience Movement (CDM) ah a telmi tuanvo ngei pakhat nih ” Kannih hi GAD zungah rian a tuanmi kan si i ralkap uknak lakmi duhlonak alanghtermi hakha mipi sin ah kan zungin minung tam ial lamzawhnak ah kan i tel ve. Cu bantuk kan i telnak cu kan pu le nih an theih tik ah an kan auh i minung cu intuarnak a ngei dih mi kan si hibantuk in duhlonak zong nan langhter ko cang i nan thin țhum ko cang ulaw thaizing cun zung rak kai than sawh ko uh. Midang cu hmanthlak hna an i post i si ko. Rak kai than ko uh. Tuni bantuk nan cawlcanghnak le nidang zung nan kai lomi zong kan maimilhpiak ko hna lai tiah an kan ti nain hitluk in minung nunnak tiang a liam cang pin ah mizapi zong nih ralkap uknak duhlonak an langhter lio ah kan nih cozah riantuan pawl zong um sawh sawh in kan um ko ding hi kan sia a rem lo caah kai lo dingin biachahnak kan ngeihnak a si tiah” media pawl biahalnak ah a chim.

Cun Cozah riantuan a dang pawl zong CDM ah i tel cio cu an duh ka zumh ko. A sinain mi tam deuh cu Cozah Quater ah a um mi an si tik ah chungkhar kong le inn hlan man kong tbk pawl an ruah caah an țih deuh le si lai. CDM ah a tel rih lomi kan hawile zung dang dang hna zong nih a tulio caan ah zei hi dah kan tuah awk a si timi nanmah te cio in rak i ruat ulaw a si khawh ahcun rak i tel cio ko uh. Hiti ka chim tik ah kan tukforh hna nak le kan sawilem hna nak a si lo nanmah le nan thinlung um cio si ko lai tiah a chinchap.