Kan Riantuanmi Zohfel Le Thapek Ah Chinram Ka Rak Tlawn Hi A Si; US Embassy Palai George N. Sibley
City Hunter| 2018 February 15| US taanzung (embassy) in lutlai bik changtu le a riantuantu pahnih cu February 14 ah Chinram khualipi Hakha a phan. February 16 chun, The Chinland Post zung ah Chin media cheukhat he ton biaruahnak an ngeih lio ah tutan Chinram ka rak tlawnnak a ruang bik cu Chinram ah an riantuanmi zohfel le thapek ruah ah an rak tlawnnak kong a chim.
“Tutan Chinram kan rak tlawn hnawhchan bikmi cu US embassy nih Chinram ah bawmhnak kan pekmi hna an riantuanmi zohfel ah siseh, Chinram zatlang bu, biaknak bu le cozah bu hna nan riantuanning hngalh duh ah kan rak tlawn hi a si. February 15 zingka te ah khan US embassy zung nih TB zawtnak hlohnak le ngandamnak caah bawmhnak kan pekmi Chuncung khua ah kan kal i an riantuanmi zohfelnak ka va tuah. An riantuanmi hlawhtling tuk i kaa lunghmuih tuk” tiah Myanmar ram, US taanzung in lutlai bik changtu (Deputy Chief of Mission) George N. Sibley nih The Chinland Post zung tonbiaruahnak ah a chim.
“Thiamsang hna hlathlai ning ah Kawlram ahhin a kumfatin TB zawtnak a ngeimi 190,000 an si nain cozah nihcun 140,000 lawng an si tiah an langhter. A taangmi 50,000 hi zeitindah cozah nih cazin ah a telh hna lo ning an si, anmah pawl thlopbulnak ding riantuannak caah rian kan tuan cuahmah. US taanzung nih Kawlram pumpi ngandamnak caah a kumfatin US$ 34 million lengmang bawmhnak kan pek. Hi chung in TB zawtnak hlohnak caah US$ 6 million hi a kumfatin an hman ve” tiah Kawlram US taanzung in lutlai bik changtu George N. Sibley nih a chim.
Kawlram, US taanzung lutlai bik changtu Chinram a khualtlawnnak chung ah Falam ah biaknak hruaitu upa le zatlang mibu hna he February 14 ah ton biaruahnak an ngei kho. February 14 zanlei ah Chin ramkulh hluttaw Speaker he ton biaruahnak an ngei kho. Hakha khuacuanh tlang, Carson le Larau thlaan zohfelnak a ngei. February 15 zingka ah Ngandamnak lei caah US taanzung nih bawmhnak an pekmi Chuncung khua ah kal in an riantuanmi zohfelnak a va ngei kho. February 15, The Chinland Post zung ah Hakha hrambunh media cheukhat he ton biaruahnak an ngei kho. February 15 chun hnu ah Chin Human Rights Organization he tonnak an ngeih dih hnu ah Chin ramkulh Chief Minister he ton biaruahnak an ngei kho. Hakha khuanu khuap le zatlang mibu he ton biaruahnak an ngei lai.
February 15 zan ah Kawlram US taanzung i Education and Cultural Affairs bawmhnak in Chin Christian University ah 2017 December thla in cawn thawkmi Access Microscholarship program hunnak le an riantuanmi zohfelnak a ngei lai. February 16 ah Myanmar ram US taanzung in lutlai bik changtu George N. Sibley le a riantuan hawi pahnih cu Hakha in Yangon lei ah an kir than lai tiah kan theih.
Chin media cheukhat he ton biaruahnak ngeih lio ah media zapi aiawh in The Chinland Post Editor in Charge Salai Ngun San Aung nih minute 10 chung Chin media a dirhmun, a thadernak le thawnnak, cun zuamcawhnak a tonmi tibantuk chimhfiannak a ngeih.
About The Author
