Kanpetlet Ah Loknu Culture & Rhododendron Festival Puai An Tuah Lai

TCP-Thantlang|2020 January 22| Chin ramkulh thlanglei laitlang Kanpetlet khua ah Khonuamthung tlang thingram le pawngkam kilvennak kong, Chin thilthuam le nunphung kilven le hmuhsaknak, chanthar mino hna nih nunphun kongkau an theihhngalh i an thlau lo nak ding ca le ramchung/leng khualtlawng an tam in an rat duh nak hnga ding caah a tubantuk in puai tuah an timh hi a si.

Mah pin ah a voi khatnak bik Kanpetlet khua ah Pengkomh (kha-yan) zung a dir kum zong a si caah a tubantuk in January 25-26 (nihnih chung) sunglawi ngai in an tuah lai.

Mah ni ah Loknu (Kanpetlet) ram in a chuak mi Lai rawl, cin thlak mi tisik ann-hnah, le nunphun he aa pehtlai mi hmuhsaknak (piah-khan) dangdang tuah ding, le Loknu (Kanpetlet) Laam le hla zong hmuhsaknak zong an tuah chih lai. Cun hi kong he pehtlai in Biazai le Capar tial zuamnak le laksawng peknak zong an tuah lai.

Hi ni ah Chin ramkulh cozah tuanvo ngeitu hna zong tlun in Kanpetlet khua ah Tourist Information Center zong tuah ding in tihtuah nak ngeih a si. Cun Victoria (Khonumthung) tlang kainak zong a um lai tiah theih a si. (Ref: MOI)