Kanpetlet Khuachung Kahdohnak Ah SAC Ralkap 3 An Thi
Salai Mangpau| September 28, 2023 — Kanpetlet khuachung ah GAD zung le fimcawnnak zung ah umhmun a khuar mi SAC ralkap pawl cu CDF-Kanpetlet nih September 27 ah an kah i SAC ralkap 3 an thi, tiah CDF Kanpetlet nih cathanh an chuah.
September 27 ah Kanpetlet khuachung GAD zung umhmun a khuar mi SAC ralkap cu CDF-Kanpetlet nih zing suimilam 6:00am in zing suimilam 11:00am tiang an kah hna i SAC ralkap 3 an thi, hliam a tuar mi an tam.
September 27 zaanlei suimilam 2:00pm in 3:00pm tiang Kanpetlet khuachung fimcawnnak zung ummi SAC ralkap cu CDF Kanpetlet nih an kah ṭhan hna i a thi mi le aa hliam mi an um nain a thi mi zat fehternak an tuah kho rih lo.
Kanpetlet GAD zungpi cu CDF-Kanpetlet nih lak an timh nain hriamngan in an kah mi kha an timh mi hmun an khen khawh kho lo caah le hriamngan kahbawmhnak le drone kah bawmhnak a um khawh lo ruang ah CDF-Kanpetlet ralkap bu hnulei kan pil ṭhannak a si tiah cathanhnak ah an tial.
Kanpetlet khuapi ah hin zeitik caan poh le khoika hmun poh ah kahdohnak a chuak kho mi a si caah zapi cu umkal le ṭhutdir i ralring ding in CDF Kanpetlet nih theihternak cathanh an chuah.
