Kanpetlet Peng Fimcawnnak Zung Lutlai Nih Minung 70 Leng Ningcanglo In Thlakhat Thlahlawh A Zuh Hna
Salai Ngun San Aung| 2018 March 7| Chin ramkulh, thlanglei Laitlang Kanpetlet peng chung fimcawnnak zung rian tuantu minung 70 leng fimcawnnak zung lutlai nih thlakhat chung an thlahlawh cu ningcang loin a zuh hna tiah min langhter a duh lo mi zung rian tuantu pakhat sin in theih a si.
Kanpetlet peng fimcawnnak zung lutlai U He Lwun nih October thla kha zung nan luh hnut caah tiin thlakhat chung minung 70 thlahlawh a kan zuh dih. Cun cu a zuhmi hna tangka cu Cozah bank zong ah a chia than fawn lo tiah a chim.
Cuti thlahlawh a zuh mi hna pawl cu B.A camipuai (Awaytin/distance education) a phi mi an si i minung pakhat ah thlakhat 240,000 MMK a ei mi an si. Mi cheu cu 40,000 lawng a zuh hna i mi cheu cu 190,000 tiang a zuh mi zong an um tiah a chim chap.
“Cozah riantuan nih khunhlaknak nawl kan ngeih mi ni 17 leng in a bau mi cu dan tat nan si lai ti zong zeihmanh a hlan kan thawngtheih ter nak a kan tuah lo. Tu bantuk in awaytin a phimi siangcachim dantat cu a tlari lo. Camipuai phit an kal hlan ah peng fimcawnnak zung ah tha tein nawl an hal cia mi a si ko i, cu bu ah tubantuk in thlahlawh zuh in dantat timi cu a tlari lo tuk mi a si” tiah a chim.
Cu leng ah ramkomh fimcawnnak zung pi nih siang cachim dihlak caah uniform hni hring zungkhat cio le angki rang cawknak ah tangka 5000 MMK cio pek mi zong ramkulh, pengkulh le ramthen dang cu 2018 January thla dih ah khan an pek dih cang hna. Kannih Kanpetlet peng bel cu hni hring zunkhat cio lawng a pek hna angki rang cawknak 5000 MMK cu tu tiang a pe rih hna lo. Cu tangka cu cozah bank zong ah a chia fawn lo tiah a chim fawn.
Kanpetlet peng ahhin siang cachim 720 an um i kannih peng hi Ramkomh Myanmar ah a sifak bik Chin ramkulh chung hmanh ah sifak mi peng kan si ruang ah maw si hnga zeidik kan peng ah cozah nih an chiah mi zung riantuan pawl nih hin mizapi hi namneh le zeirel loin pehtlaih le chawnhbiak zong kan tong ngai tiah a biadonhnak ah a chim.
Hi kong ah Chin ramkulh Fimcawnnak Minister Pau Lun Min Thang kan pehtlaih tik ah, sianginn uniform kong cu kan theih nain nai te lawng in kan theih caah kan tlangtla kho rih lo. Cun thlahlawh zuh kong cu tu lawng ka theih i a rang bik in hlathlai le tlangtlak khawh kan i zuam lai tiah a kan leh. +++
Ref.: Chin Human Rights Organization (CHRO) he pehtlainak in repawtmi a si.
About The Author
