Kanpetlet Peng, Ni 4 Chung Kahdohnak Ah SAC Lei 19 An Thi
The Chinland Post | 2023 July 20 — Chin ramkulh, Kanpetlet peng ah July 16 in July 19 tiang ni 4 chung kahdohnak ah SAC lei 19 an thi i hriam le kuanzen pawl bawmhnak kan herh ko tiah CDF-Kanpetlet nih bawmh halnak zong telh chih in thawng an thanh.
July 16 zinglei sml 8:20am in 9:00am tiang CDF-Kanpetlet phufonh nih Suailuaicin khuate pawng SAC ralkap pawl an kah hna caah SAC ralkap 6 an thi i tampi an i hliam.
July 18 zinglei sml 7:00am-7:30pm tiang Kanpetlet peng, Suailuaicin le Masatui khua karlak ah kahdohnak a chuak ṭhan i SAC lei ralbawi telh in 5 an thi i tampi an i hliam, cu ni zinglei sml 8:30am ah kahdohnak a chuak ṭhan i SAC lei 3 an thi.
SAC nih July 18 zinglei sml 9:30am in 11:00am karlak ah Jet Fighter in bom voi 5 a thlak.
SAC ralkap nih vanlawng in bomthlak ruang ah BCM biakinn telh in mipi inn 7 a rawk tiah theih a si.
July 19 ni Masatui khua tanglei ah kahdohnak a chuqk ṭhan i SAC lei 5 an thi, tampi an i hliam. Ni 4 chung kahdohnak ah mipi lei hriamtlai 4 an i hliam tiah theih a si.
CDF-Kanpetlet nih SAC ralkap pawl pehzulh in an doh khawh nak hnga hriam le kuanzen pawl lakhruak in kan herh ko tiah bawmh halnak zong an thanh chih.
