Kan Ram Buai Lio le Khrihfa Mission Rian Kong
Salai Mang Pau | 2024 September 11 —
1.Nihin Chin ram khuate tam deuh cacawnnak ah cachim tu saya te an tlawm hlei ah an thlahlawh nih innchungkhar pawcawmnak cu chim lo facang tunkhat hmanh a caw kho ti lo. Mi pakhat pawcawmnak hmanh a deih bak lo.
Rambuai hlan Chin ram ah cozah lei cachim tu 9,120 hrawng an um ti a si. Atu lio CDM tuan mi chung in khuate ah cachimtu hi 4,200 hrawng lawng an um. Chin ram ah zatuak 75% hi khuate um an si hna.
2.Mirang Siangbawi hna lungput le cachimh rian
Chin ram Missionary le Cachim Rian
1899 kum March thla 15 ah Rev. Carson le Laura cu Hakha khua an rak phan.
1900 kum ah sianginn dirh in cachimh rian an thawk. Mirang kan siangbawi hna an i hmaithlak bik mi cu Chin miphun fimthiamnak pek le zumtu thar si ter in Khrih ah nutling/patling si ter. Cachimh pah he Khrih thawngtha an chim.
3.Chimram ah Buddhist Phungki Pawl Cachimh Rian An Ṭuanning
Chin ram milu 475,000 hlei ah Buddhist milu 600,00 hlei an si. Biaknak dang (Islam..tbk.) zong an um ve.
2014 Myamar ram milu rel (Census)
Buddhist milu an karhnak cu cozah he komh in tuan ti mi Nahtalah (နတလ) sianginn hi Chin ram ah 9 a um. ဘုန်းတော်ကြီးကျောင်း (Bahkah) Phungki nih dirh mi sianginn 16 an rak um.
Chinram peng kip ah Buddhist missionary pawl nih sianginn an dirh mi 25 an rak um ti khawh a si.
4. Nihin Chinram Pastor le Cachim tu hna
ram buai lio ah zumlo tu umnak khua zei khua hmanh ah Khrihfa mission tuan khawh a si lo caan ah Khrihfabu tampi nih mission caah tiin tangka chawva thawh ter peng a si ko. Khuate tam deuh cachim pakhat thlahlawh hi buakthlak in kyat 150,000 an pek khawh. Nikhat kuli tuanman ah kyat 15,000 thlakhat ah ni 25 kuli tuan ahcun kyat 375,000 a si. (khuakhat le khuakhat thlahlawh pek ning aa khat cio lai lo). Khuate Pastor thlahlawh hi kyat 300,000 a si. Pastor thlahlawh le cachim thlahlawh hi a let in aa thlau tuk hringhran ko. Biakinn le sianginn sak ning zong aa thlau tuk rih.
Adonghnak
Cucaah Convention maw? Association maw? Area maw? Khrihfabu kip nih rambuai lio caan te ah mission riantuannak ah timi lungput he mah le umnak khuate sianginn kip ah Chin ram khuate um laihlum mi kan pastor hna nih caan chiat lio ah missionary rian ka tuan ve timi lungput he khualei cachimh rian ah an caan an pek awk a si tiah ka hmuhning a si. Pastor te nih ca an chimh lo hmanh ah kan tangka chawva tel hi cacawng mi ngakchia (Pastor, Khrihfa upa, Nubu upa, Mino upa, Mission upa, Mizei kan fa zong an i tel dih ko) caah khua sianginn te ah kan tangka hi kan hman chung ding a si ko tiah ka ruah ning a si.
About The Author
