Karen, Mon le Taningthari Ramthen Ah Vawlei Ekah Sing 3 Leng Tilian Nih A Hrawh
Salai Aung Aung| 2018 August 2| Karen, Mon Taningthari ramthen ah cazin an lakmi ning in tilian nih leihmun ekah sing 7 tluk a khuh ti a si i ti a hung zor tikah a tu hi ekah 6 cu ti nih a tumtak cang. Hi chungah ekah sing 3 tluk cu thlaihrawl an rawk dih tiah tuanvo ngei cozah lei nih thawng an thanh.
July 27 cazin lakmi ning in ti lian nih a hrawhmi lohmun ekah sing 3 chung ah chihria cinnak ekah sing 2 le facang cinnak ekah sing 1 a si ti a si. Thlairawl a rawkmi leihmun chungah facang an cin than i ekah 60,000 tluk an cin than khawh cang tiah theih a si.
Pago ramthen zong ah ti nih a hrawhmi a tampi caah cazin an lak cuahmah lio a si ve. Cun ti nih a hrawhmi leihmun ah facang a cing than mi hna nih an herhmi a thuannak le a cinnak zong siseh cozah lei nih kan bawmh hna lai tiah U Myo Tint Htun nih a chim.
Chihria a rawkmi tu cu cin nolh awk a that ti lo caah chihria voi a zor ngaingai lai nain facang bel hi cu cin caan a um rih caah a zor tuk lai lo tiah an chim.
July 1 ah hi bantuk harnak a tongmi hna tlangtlaknak lei zung nih thawng an thanhmi ning in Karen, Mon, Taningthari, Pago le Magwe ramthen ah ti lian harnak ruang in minung 150,000 dengmang nih innlo an zaamtak i a thimi 25 an si, hartong chiahnak hmun 327 ah a nungmi pawl hi an um ti a si.
Hi hartong mi pawl caah UN zong nih bawmhnak ka pek lai tiah a ti.
Ref: BBC Burmese
