Karen ram ah ah mipi a thimi 257 an phan

 

The Chinland Post | 2022 April 25 – Myanmar ram ah hramhram in uknak lak a si hnu Karen ram chungah mipi a thimi 257 an phan tiah Progressive Karenni People Force (PKPF) nih April 24 ah a thanh.

A thimi mipi pawl hi SAC ralkap kut in a thimi an si tiah Progressive Karenni People Force (PKPF) rianngeitu nih a chim.

“Kahdohnak a fak chin i SAC lei an sungh pah caah mipi cungah a ruang um loin an thah hna, hri an ṭem i an thah hna. Hriamngan in kahthorh an kah ruangah a thimi hna an si”.

Demoso peng chungah a thimi an tambik i, Loikaw, Pharuso peng, Phekhon peng le Balkhe peng hna zong an i tel.

A thimi mipi pawl hi duhlonak langhter lio ah a thimi 2, ralzaamnak ah a thimi 24, SAC ralkap nih a thahmi le hriamngan ruangah a thimi 231, tiah a zapi te 257 an si.

Cu chungah kum 18 tang a thimi 19 nak tlawm lo an um tiah a thanh.

Ralzaam camp ah a thimi pawl hi sii-aii lei chanbau ruang le eidin a chanbau ruangah a si tiah a chim.

SAC in biachimnak nawl a ngeitu Major-General Zaw Min Htun nih cun Karen ram chung a thimi ah mipi an i tel lo tiah a chim.

Karen ram hi hramhram in uknak lak a si hnu ah kahdoh a fahnak hmunhma a si i innlo a zaam takmi 200,000 deng an phan tiah Karen mipi bawmhnak cazin in theih a si.

Na ruahning rak langhter ve.. (Leave a comment)

%d bloggers like this: