Karen ram September thla chung kahdohnak ah SAC ralkap 100 leng an thi, 60 leng an i hliam
The Chinland Post | 2022 October 4 – Karen ram September thlakhat chung ah kahdohnak voi 57 nak tlawm lo a chuak i SAC ralkap 100 leng an thi, 60 leng hliam an tuar tiah KNDF nih October 2 ah a thanh.
September thlakhat chungah Karenni ram, Demoso peng ah kahdohnak voi 18, Hpruso peng ah voi 14, Loikaw peng ah voi 11, Pekon le Moebye peng ah voi 9, Sharrtaw peng ah voi 3, Bawlakhe peng ah voi 2 tiah a zapi te voi 57 nak tlawm lo a chuak tiah a thanh.
Kahdohnak pawl chung ah SAC ralkap 104 leng an thi i 60 leng hliam an tuar.
SAC ralkap sin in MA 1 zuun 3, MA 2 zuun 3, MA 3 zuun 8, Machine Gun zuun 1, 60MM kuan, RPG kuan, bom, zen le an thilri tampi an lak khawh i mawṭaw 1 zong an hrawh khawh tiah theih a si.
Kahdohnak chungah KNDF hriamtlai 5 an nunnak a liam i thlakhat chungah SAC ralkap hriamngan ruangah mipi inn 100 leng, biakinn 2 a rawh bantuk in kahdohnak um lo piin hriamngan an kah ruangah mipi inn 7 leng a rawk i vanlei kahdohnak voi 16 a tuah tiah theih a si.
SAC hriamngan ruangah mipi 10 an thi i 19 an i hliam, SAC nih hmanh takmi bonrap lam sual ruangah mipi 1 a thi i 4 an i hliam i SAC ralkap nih mipi 2 an thah hna tiah theih a si.
About The Author
