Karen Ramkulh Tin Kan Nyi Naung Ah SAC Helicopter Tla Lak In An Kah, Light Infantry Division – LID 44th Commander Major General Aye Min Naung Telh In Mi 5 An Thi
The Chinland Post | January 29, 2024 — Karen ramkulh, Myawaddy peng, Tin Kan Nyi Naung hrambunh LIB 355 ah January 29 zaanlei sml 2:30pm ah SAC helicopter tla lak in kahnak ah Light Infantry Division ( LID) 44th commander Major General Aye Min Aung telh in minung 5 an thi tiah Karen Information center-KIC nih a langhter.
Ralkap minung thlen ding in a ra mi mah helicopter cu mipi ralkap Sniper meithal in an kah i vanlawng mawngtu Pilot a khen caah atu bantuk in Helicopter a tlak i minung an thihnak hi a si.
Mah helicopter hi LIB 355/356 battalion 2 karlak ramlak ah a tla tiah Tin Kan Nyi Naung khuami nih an chim.
SAC nih uknak a lak hnu ah mipi ralkap nih an hrawh mi le tla lak in an kah mi hna cu –
- A pakhatnak vanlawng kahnak hi May 3, 2021 khuapau dohtlennak hramthawk ka Kachin ramkulh, Moemeik peng, Tower tung kahdohnak ah Russia ser Mi-35 cu KIA nih tla lak in an kah.
- A pahnihnak vanlawng rawk lak in an kahnak cu Hmawbi Air base Quarter ah Russia ser Yak-130 vanlawng number 1802 le 1803 cu Febuary 18, 2022 ah People’s Force (Yangon) nih lamhla remove control bomb in an kah.
- Apathumnak cu January, 2023 Chinram, Thantlang khua lei a ra mi Mi 17 thilphor Helicopter cu CDF- Thangtlang le CNA nih drone in an kah i Helicopter an khen caah meikhu a chuak i Thantlang khua ah tum kho ti lo in a hnu lei a kir ṭhan.
- A palinak ah Sagaing ramthen, Hommalin peng, Shwe Phi Aung khua kahnak ah ralkap Helicopter 1 cu February 1, 2023 ah an kah khawh.
- A panganak ah SAC fighter 1 a voikhatnak kahnak cu June 30, 2023 Karenni ram, Bawlakhe pengchung ah K-8 cu a tla.
- A vawiruknak ah November 11, 2023 kum ah KNDF-BO1 le KIA nih Karenni peng ah K8 W jet fighter an kah.
7.A voi sarihnak cu January 16,2024 kum chun sml 12:00pm hrawng ah Shan ram chaklei, Kutkai peng, Nam Hpat Kar khua, Ma-nu-yan hmunhma ah bom a rak thla mi ralkap kahdohnak vanlawng pakhat cu KIA nih an thlak i cu vanlawng hi Tuluk ser FTC 2000G a si i a mawngtu Major le a bawmtu Captain hna an thi.
- A pariatnak ah January 29, 2024 Karen ramkulh, Myawaddy peng, Tin Kan Nyi Naung khua ah zaanlei Sml 2:30 ah SAC helicopter tla lak in kahnak ah Light Infantry Division (LID) 44th commander Major General Aye Min Aung telh in mi 5 an thi hi a si.
