Karenni hmunhma May thla chung kahdohnak ah SAC ralkap 100 leng an thi
The Chinland Post | 2022 June 3 – Kayah ram, May thla chung kahdohnak ah SAC ralkap 107 an thi i a nung in 5 tlaih an si tiah Karen National Defense Force (KNDF) nih May thlakhat chung kahdohnak kong a thanh.
May thla chungah SAC nih Pharuso peng, Bawlakha peng, Loikaw peng le Pekon peng hna ah kahdohnak fak a rak tuah.
Shan-Kayah ramri, Moebye le Loikaw ramri lengah nichuah lei Pekon tiang hmunhma tlaih khawhnak caah SAC nih fak ngaiin kahdohnak a rak tuah.
Karenni phufonh hna nih May 12 in Nyaungshwe peng, Htiri khua ah a ummi SAC gate sakhaan cu an luh hnawh hna i SAC ralkap 20 an thah hna i a nung in 5 an tlaih hna lengah hriamngan/hme phun 12 chuh khawh an si tiah a thanh.
Karenni phufonh hna nih gate an luh hnawh hnu May 15 thok in SAC nih nichuah lei Pekon peng khuate a simi Saungnankhay, Nanpunglone khua lei in phu khat le Moebye khua ah hrambunh in a ummi Infantry 422 nih Semilo khua lei in phukhat tiah phu hnih in kahdohnak a thok caah kahdohnak fak a rak chuak.
SAC ralkap pawl nih May 16 ah Saungnankhay khua ning in an khangh i, Loipaw le Nanpon khuate mipi inn hna zong an khanghpiak hna tiah KNDF nih a thanh.
Kahdoh a chuahnak nichuah lei Pekon, Moebye le Pekon khua hna ah hram a bunhmi SAC battalion pawl nih hriamngan in kah an bawmh hna, Pekon le Pinlaung ramri a simi Pinpone, Lwaihui, Taungmetin khua le a pawngkam khua hna ah SAC ralkap le Pa-O National Organization (PNO) fonh in thazang an chap.
Pinlaung peng Tatanku, Lwinkay le Kahtanthit khuate hna ah SAC ralkap le PNO ralkap pawl nih khuate chung inn pawl an bauh, Catholic Mother thlaan zong an hrawh tiah KNDF nih a thanh.
SAC ralkap pawl cu Pharuso le Bawlakha peng hna ah eidin phor mawṭaw he an rat lioah KNDF phufonh hna nih an bawh hna caah a thimi le hliam a tuarmi an tam tiah a langhter.
Cu kahdohnak ahcun SAC ralkap mawṭaw pawl a rawk tiah a langhter. Pharuso-Bawlakha lamthluan cu SAC nih thazang an i chap khawhnak hnga le eidin an i chanh khawhnak hnga caah tlaih an duh i a si lai tiah an ruahdamh.
Demoso peng chungah Nanmaekhone in Demoso khuapi sangkip tiang SAC ralkap pawl nih hmunhma an khuar ko nain a thli tein kahdoh an ton ruangah kahdohnak hme tete nifatin in a cang tiah KNDF nih a thanh.
Loikaw peng chungah SAC ralkap pawl nih Loikaw khua chuahnak khuate hna ah tank he thazang an samh caah kaphnih karlak kahdohnak a fak tiah KNDF thawngthanhnak in theih a si.
About The Author
