Kate Hriamtlai Ralbawi Telh In Kate Minung 5 Sagaing Ramthen Ah Tlaih An Tong
Salai Bawi Lian Sang| TCP-Kalay| January 11, 2021| Aluancia 2020 August thla ah Monywa Chindwin donhhlei ah minung (5) a rak tlaihmi Kate(Manipur) hriamtlai lak ah an ralbawi pa cu Sagaing khua Zeya sang No.5 ah nu pi he a um mi a si tiah theih a si.
Amah hi Myanmar ram ID a ngei mi le innchungkhar he Sagaing khua ah a um tiin Sagaing peng Immigration (Lahwahkah) zung nih January 9, 2021 ah Sagaing khua Myomah Palik sakhan ah report pek in a dantat a si tiah Lahwakhkah nih an chim.
“Tlaih a tonmi pa hi India ram Manipura ramkulh (Kak chin Tokpaching) ah a ummi India ram Kate hriamtlai ralbawi Captain (People Liberation Army-PLA) a si. Myanmar ram ID 1/Mahngiahnah(Naing) 129698 a ngei i Sagaing khua Ywathawng sang um Kawlnu he ai thitum mi fanu pakhat a ngeimi a si” tiah min langhduh lo Lahwahkhah riantuan tu nih a chim.
Kate ralbawi Captain Nawra@ Devanl –kum (33) cu 2014 kum ah Kachin ramkulh Moengein pengkulh Hopin peng Myawady sang um min in Myanmar ID a rak ngei mi a si tiah theih a si.
Mah Myanmar ID ngeimi kong he pehtlai in India ram mi a si le si lo cu Sagaing peng Lahwahkah bawi U Lay Maung nih Rampi Cozah ramdang pehtlainak Vuanci sin bia halnak a tuah hna hnu ah Captain Nawra@ Devanl hi India rammi a si cu theih a si.
Cucaah Sagaing peng Lahwahkah bawi U Lay Maung nih Myanmar ram ID ngei India rampa Nawya@ Devanl cu Sagaing khua Myomah palik sakhan ah Nizan (pah)5/2021/1947 kum Myanmar Lahwahkah Upadi pohmah 13(1) in report a tuah nak a si.
Report a tonmi Kate ralbawi hi 2020 Kum August 13 ah Monywa Chindwin donhhlei gate ah Mandalay in Tamu peng lei Parado motor in a rat lio ah palik nih an check tik ah mah motor chung aa tel ve mi Myanmar ram ah phungning lo in a lut mi Kate miphun 5 he tlaih an rak tong. A tu Monywa thonginn ah an chiah in bia hal nak an tuah lio a si tiah thawng theih a si.
Ref: Voice of Myanmar