Kawl Ralkap 6 Nih An Velhmi Matupi Pa Cu Sia Le Vok In An Nawl Hna
Salai CungCung|2019 May 6| 2019 April 20 ah electric zung cozah riantuantu pakhat kawl ralkap nih an velhmi cu Chin nunphung ning in Sia le Vok pakhat in an nawl hna tiah kan theih.
“Tu cu khat le khat lungtlinnak kan ngei cang. Chin miphun nunphung ning in Sia le Vok pakhat in a kan nawl. Hi nawlnak ah hin pastor pakhat, a ka velhtu minung 6 le ralbawi zong an rak ra ve” tiah Salai Boi Ha nih a chim.
“Khaphnih lungtlingnak an ngeih caah kanmah lei in cun chim ding a um ti lo. Nain nuhrin covo kongkau lei in zoh ah cun ngaihthiam awk an si lo ti kan hmuh. Hi bantuk thil a caan than lo ding in an mah lei zong an i ralrin a hau lai. Hi bantuk thil can hi Chin nunphung in si lo in Upadi ning tein kal seh ti ka duh. Pakhat le pakhat i remnak ahhin Chin nunphun phunlam in kal ti lo in Upadi ning tein kal cang u sih ti ka duh. Tu cu a bu in thil cang mi a si caah a poi khun. Khat le khat lungtlinnak in thil a dih i hmailei caan ah a lem sual hna lai ti ka phang” tiah ralkap kar le Salai Boi Ha kong hepehtlai in CHRO field Director Salai Terah nih a chim.
“Bungtla electric zung ah furcaan le khuasik caan ah cun ti a tam caah kawl ralkap umnak lei hi nikhat dang in mei kan pek tawn hna. Asinain thalcaan, abik in April-May ah cun ti a zor tuk caah kawl ralkpa umnak lei hi nikhat ah suimilam pakhat le cheu tiin timh tuahnak kan ngei. Kumdang zong ah cutin kan pek peng ko mi hna, tu hi zeitindah an ruah ka thei lo. 2019 May thla chung ah ralkap a ka velmi pawl ka auh hna lai i tha tein ka hal than te hna lai” tiah Salai Boi Ha nih CHRO sin ah a chim.
Matupi Bungtla electric mei lak mi a zohkhenhtu lutlai Salai Boi Ha kum 30 cu April 20 zarhteni zaan ah khan ti tha a zor deuh caah Kawl ralkap bu Kha La Ya-140 lei an pekmi mei cu chikkhat an hmihpiak chung hna. Cu mei hmihpiak mi cu “zeiruang ah nan hmih” tiin kawl ralkap 6 nih an velh tiah CHRO sin in kan theih. Cuti an velhnak ah cun Salai Boi Ha cu a lu kuai i awrhlei kutdong pakhat a kiak tiah kan theih.
Salai Boi Ha a veltu hna hi Kha La Ya 140 in ralkap bawi Kyaw Kyaw kut tang mi an si, anmah pawl cu tu hi ralkap umnak thong ah an chiah lio hna a si tiin ralbawi pa hmurka in kan theih tiah Salai Boi Ha nih a chim.
Ref: Chin World
About The Author
