Kawl Ralkap le AA kahdohnak in Chin mi 18 tluk an tlau: CHRO

Salai Tluangkipthang — Chin ramkulh Paletwa ah 2015 thawk in 2020 tiang ah Chin miphun minung 18 tluk an tlau cang tiah Chin Human Rights Organization (CHRO) nih August 30 ah cathanh an chuah.

CHRO nih Cathanh (Statment) in, “August 30 hi ‘International Day of Victims of Enforced Disappearances’ (kahdohnak, ral tbk. le nawlngeihnak he a pehtlaimi kong ah a tlaumi hna ni) a si. Nihin tiang ah Chin miphun 18 tluk an tlau, an umnak theih an si lo. Hihi 2015 thawk in Kawl Ralkap le AA an i kahdohnak ruang ah a si i, pumpak zalonnak, humhimnak an buarmi” tiah an chuah.

“Nihin atu bantuk caan ahhin, Paletwa peng ah Kawl Ralkap le AA kahdohnak ruang ah a tlau mi hna chungkhar le dawtu nih an intuarmi kan hrawmpi hna. Atu ah, AA nih tlaihkhihmi hna an sining le kongkau felfai tein theihternak tuah ding le a hren rihmi hna a nungmi an um ahcun AA nih kan thlah piak hna seh” CHRO ED Salai Bawi Lian Mang nih a chim.

Cun, CHRO cathanh ah Kawl Cozah nih UN nih chuahmi zulhphung (Enforced Disappearance Convention) minthut ding le AA nih an hren rihmi hna hlah than ding zong an langhter.

Nihin tiang Chin miphun a tlau rihmi hna cu;

1. Salai Benjamin – Yat Chaung khuami – 27 November 2018 in a tlau
2. Salai Kyaw Naing – Yat Chaung khuami – 27 November 2018 in a tlau
3. U Khu Luh – Yat Chaung khuami – 27 November 2018 in a tlau
4. U Kyaw Aye – Than Taung khuami- 14 June 2019 in a tlau
5. Salai Myint Maung – Than Taung khuami- 9 June 2019 in a tlau
6. U Maung Maung Che – Muang Yua khuami- 14 September 2019 in a tlau
7. Muang Pu Che – Muang Yua khuami – 14 September 2019 in a tlau
8. U Muang Hla Khine – Muang Yua khuami – 14 September 2019 in a tlau
9. U Sa Baung – Nan Chaung Wa khuami – 10 August 2019 in a tlau
10. Salai Kyaw Kyaw Than – Baung Wa khuami – 16 July 2019 in a tlau
11. U Kyaw Sein – Baung Wa khuami- 16 July 2019 in a tlau
12. Maung Kyaw Lin – Baung Wa khuami- 16 July 2019 in a tlau
13. U Soe Ye Aung – Baung Wa khuami- 16 July 2019 in a tlau
14. U Muang Phyu – Taung Shey khuami- 21 Feb 2020 in a tlau
15. U Lin Win – Myo Thit khuami – 10 April 2020 in a tlau
16. U Aung Wa – Myo Thit khuami – 10 April 2020 in a tlau
17. U Myint Maung – Paletwa khuapi – 12 April 2020 in a tlau
18. Salai Aung Soe – Paletwa khuapi – 29 July 2020 in a tlau

“Atu i kan langhtermi hna Chin miphun 18 a tlaumi hna hi, kanmah CHRO nih kan khawmh khawhtawk lawng a si. A dang a tlaumi an um liangluang rih kho men. A thi lo mi zong an tam liangluang rih lai” tiah CHRO in nuhrin covo hlathlainak tlaitu Salai Terah nih The Chinland Post ah a c him.

2015 March 28 thawk in Chin ramkulh i Paletwa peng ah kahdohnak a um ruang ah a thimi hi 48 tluk an si cang, hliamhma a tuarmi hi a zaa leng an si i, a lotlaumi zong an tam cang tiah theih a si.#