Kawl Ralkap le AA kahnak nih nithum hren hnu ah Facang tun 830 Paletwa a phan: Thla hnih hnu ah facang a phanh a si

TCP Hakha| 2020 April 19 — Kawl Ralkap le AA fak ngai in an i kahnak ruang ah Sami in Paletwa ah ralzaam hna ei dingmi facang, chiti, cite, siai tbk. an phorhmi nithum a rauh hnu April 19, zaanlei sml. 3 tluk ah Paletwa tlamtling tein a phan tiah kan theih.

April 16 chun sml. 1:30 tluk ah SKAT, Mawtaw dang a nganmi dihlak 11 hmang in facang tun 885 le eidin dangdang cu Sami khua in Paletwa khuapi lei ah kapi ding in an i thawh nain nithum a rauh hnu lawng ah Paletwa khuapi an luhpi khawh tiah theih a si.

Nupa thlu lo, Sami in Paletwa lei kalpi ding facang an mawtaw ah an khin lio. Photo: Supplied.

Hi kong he pehtlai in, Kawl Ralkap le AA kahdohnak kong ah hartongmi kong ah cawlcangmi CHRO in Salai Sang Hnin Lian nih, “Sami le Paletwa cu meng 42 tluk lawng a hlatmi a si. Kahdohnak um hlah sehlaw, amah a ni (April 16) lila ahkhan, Paletwa an phanhpi ding a si cang. Nain, Kawl Ralkap (LID 77) nih vanlawng hmang in fak tuk kahnak a um ruang ah Paletwa khua chung lut kho lo in nithum chung hmai kal awk tha lo le, hnu kir awk tha lo in an i hrennak hi a si” tiah The Chinland Post ah a chim.

Paletwa khuapi an luhpi khawhmi hi Facang tun 830 lawng a si. A ruang cu facang a phormi mawtaw pakhat lam tan ah a rawh caah, Paletwa lei a phan kho lo tiah kan theih.

Tutan zong hi, Paletwa luhnak lam chaklei thluan ah, AA nih um hmun an khuar caah lampi zul kho lo in, facang cu Paletwa in meng 4 tluk a hlatnak Kichuang ah an chiah tak i, Kichuang tiva in tilawng in Paletwa khuami nih an phorh tiah theih a si.

Thla hnih chung Paletwa lut kho lo in phih a si hnu ah a tutan hi facang a tun tambik in an luhpi khawh a si.

Ngakchia/upa thlu lo, Sami in Paletwa lei phorh dingmi facang mawtaw ah an khin lio. Photo: Supplied.

Sami khua tiang ahcun, mipi le a phu kip nih pekmi bawmhnak a phunphun a phan kho ko. Nain Paletwa hi kahdohak a fah ruang ah zei bantuk eidin hmanh February hnu in a phan kho ti lo.

Tutan April 16-19 hlan ahhin, Pastor, Biaknak riantuantu upa le ralzam bawmhchannak ah tuanmi hna nih facang tun 100 cu Sami in Paletwa ah March 29 ah an rak kalpi nain AA nih an rak kham hna. AA nih facang tun 20 an i lak hnu ah an thlah than hna i, Paletwa khuapi an phanhpi tiah kan theih.

Paletwa khuapi chung ahhin, minung 8000 fai an um. Nihin ah Ralzam lawng in 3657 lengkai an phanh chap tik ah, Paletwa khuapi chung lila ah harsatnak tampi an tong tiah kan theih.

“Atu ahhin, Paletwa IDPs ralzam hi hmun thum ah an um: Paletwa khuapi chung, Miza khua le Sami khua hna umhmun an khuarnak a si. Sami ahhin cun bawmhnak a phan kho ko. Atu ahhin, Sami khua ah riantuantu upa an kan chimhnak, mipi le dawtu hna nih hlutmi facang tun 5200 tluk a phan cang. Nain Paletwa le Miza hi bawmhnak a lut kho hrim lo. Atu an luhpi khawh hi a lawmh a um tuk. Nain, kan philh lo dingmi cu hi kahdohnak ruang ah an harsatnak hi eidin lawng ah a si hrim lo, mi a let in an karnak hmun Sami, Paletwa tbk. ahcun Dinti, Zunput, Fenhaih in inn chungkhar hman ding namte/namtong tiang a si” tiah Salai Sang Hnin Lian nih a chim.

Chin ramkulh chung ah 2015 March thla in a thawkmi Kawl Ralkap le Arakan Army (AA) an i kahnak ruang ahhin nihin ah Chin Ralzam a tlawm bik minung 10,000 leng an phan cang.#