Kawl ralkap nih Genocide a buar tiah American cozah nih a thanh lai
The Chinland Post | 2022 March 21 – Myanmar ram ah 2017 lioah a cangmi Rohingya cungah Kawl ralkap nih a buarmi miphun ning in thahnak cu American cozah nih hranghrang in thlituah a si tiah a rak chim ko nain a tu cu mah thlituah hi Genocide a buar bak ko tiah kan thanh cang lai tiah thawng theih a si.
Washington DC ah a ummi Museum of Genocide ah March 21 ah tuahmi Conference ah American Minister of Foreign Affairs Antony Blinken nih a thanh lai tiah cozah rian ngeitu pawl nih Reuters ah an chim.
Kawl ralkap nih Genocide a buar ko tiah thanh ding mi kong ah Kawl ralkap nih hihnu ah a buar ding mi kha a kham khawhnak hnga a si tiah Department of Foreign Affairs riansang tlaitu pakhat nih a chim.
Kawlram kong zofel ding ah an dirhmi IIMM phu caah American cozah nih USD $ 1 million pek ding kong zong telh chih in thanh a si lai tiah theih a si.
US Ramleng Kongkau Committee (House of Foreign Affairs Committee) ah Rohingya buainak a hruaitu Oregon State palai Jeff Merkley zong nih President Joe Biden thiltuah hi a ṭha tiah March 20 ah a thanh colh ve.
Britain ram ah hrambunhmi Myanmar-Rohingya phu Chairman U Htun Khin nih American cozah i a program hi a ṭha tiah a chim ve.
A tu bantuk an thanhmi hi ralkap i hramhram a thiltuahnak kha langhter a si bantuk in Rohinhya pawl tuarinnak thawng hi theihpiak a si cang timi kha Rohingya pawl zong nih thei ve hna seh tiah U Htun Khin nih a chim.
Kawl ralbawi pawl nih Rohingya timi biafang hi an al lengmang bantuk in, Rakhine ram ah hmunhma zohfelnak kan tuahmi lawng a si i vawlei pi nih an kan puhmi Genocide hi a um lo tiah an al ve.
Ref: RFA Burmese
