Kawl Ralkap nih Paletwa ah khuami an kah hna; 500 leng Paletwa an chuak kho lo

Salai Tluangkipthang – Kawl Ralkap LID 11 nih tilawng 50 tluk in Paletwa in Khua lei kir a timi minung 500 leng cu meithal in an kah hna ruang ah an an kal kho lo, Paletwa ah an i tap ko tiah Chin Human Rights Organization (CHRO) nih July 8 ah cathanh an chuah.

“Kawl Ralkap phu Light Infantry Division (LID) 11 tang ah a ummi ralkap cheukhat hi Paletwa in minute 3 tluk lawng in kalnak hmun Kaladan Tiva kiang ah umhmun khuar in an congh. Tlungkal pawl cu meithal kah in an tlerh hna caah ahohmanh an khua lei kir ngam lo in Paletwa khuapi chung ah an i tap ko” tiah theih a si.

“July 6, zing sml. 7 tluk ahkhan, tilawng 4 hmai an an kal chung a hnu ah lawng tampi n ih an zulh hna. Cu hmai a kalmi lawng 4 cu Kawl Ralkap nih varal in an rak kah hna, meithal zun 6 leng an puah hnawh hna caah hmailei kal ngam tilo in an kir than” tiah CHRO nih a thanh.

Kawl Ralkap vanlawng nih Khuate a rak kahnak ah hma a tuarmi Sami an phanhpi hna lio. Photo: Supplied

Khuami nih Kawl Ralkap LID 11 upa (commander) sin ah tlunkalnak nawl zong an hal ko cang i tlunkalnak nawl zong an onh ko hna. Asinain, Tiva kiangkap ah umhmun khuar in a cawngtu tanglei ralkap pawl nih kalter duh lo in, an kah hna hi a si tiah theih a si.

Cathanh ning in, “atuhi, Paletwa ah ni 10 leng kan um cang. Inn lei kan kir khawhnak hnga ding caah Paletwa a taap mi min cazin zong kan khomh i, cozah (htwe-oh) sin ah kan pek cang. Nain, nihin tiang ah zeihmanh an kan tawlrel piak lo. Kan phu in voi 4 tluk Paletwa chuahtak in khua lei ah kir kan i thawh cang, nain an kan kah ruang ah kan kal ngam lo, kan kir than. Hnu lei ah kir than lo in pah chih u sihlaw, meithal kuan hma in kan thi hrimhrim lai” tiah Khuabawi pakhat nih CHRO sin ah a chim.

Paletwa ah a tangmi khuami a tam deuh hi herhhai cawk ah a rak phanmi khuami hna, cozah siangcachim hna, cun ngandamnak zung riantuantu hna, Khuabawi le khuatekomh (ohsuh) cazi hna an si. Cozah riantiantu hna cu an thlahlawh hlam ah a rami deuh an si i, Khuabawi te bel cu cozah (htwe-oh) nih thlafatin tuahmi meting kai ah rak phanmi an si tiah kan theih.

“Paletwa khuapi chung lei rak luh hi cu an kan kham lo. Nain, Paletwa in chuah hi an kan kham. Kan luh lei ah zeihmanh buaibainak zong a um lo, kan kir lei lawng ah an kan buaimi hi zeidah a si hnga, ka fiang kho hrimhrim lo” tiah Khuabawi pakhat nih a chim.

Atu bantukin, Kawl Ralkap nih mi tlungkal meithal in an kah hna ruang ah June 10 ah LID 22 nih kum 43 Myo Thant cu ralzam hna caah facang phorh ding hawile he an rak kal lio ah Seint Sin khua ah an rak kah hna nak ah a thi. Cun, May 20 zong ah kum 70 a simi Daw Hawi Khin cu Paletwa ummi ralzaam caah a hawile 10 he tihthing phorh an kalnak ah lawng cung ah Kawl Ralkap nih an rak kah hna nak in a nunnak a rak liam cang tiah theih a si.#

Na ruahning rak langhter ve.. (Leave a comment)

%d bloggers like this: